“Neçə gündür ora çökük vəziyyətdə idi, hara baxırdınız bəs?”
Bu gün səhər saatlarında Bakı şəhəri, Yasamal rayonu, Əsəd Əhmədov küçəsində yerləşən 1400 mm-lik magistral su kəmərində qəza baş verib və nəticədə ətrafı su basıb.
“Ölkə.Az”ın məlumatına görə, qəza baş verən borunun ətrafını su basıb, avtomobillərin gedişində çətinlik yaranıb. “Azərsu” ASC-nin açıqlamasında isə qəza ilə əlaqədar Yasamal və Səbael rayonlarının bəzi ərazilərinə içməli suyun verilməsində məhdudiyyətlər olacağı bilidirilib.
Qeyd edək ki, bir sıra vətəndaşlar qəza ilə bağlı aidiyyəti qurumu günahlandırıb. Bildirilir ki, magistral su kəmərinin sözügedən hissəsində dəfələrlə qazma işləri aparılıb, lakin problem aradan qaldırılmayıb.
“Azərsu” ASC-nin sosial şəbəkə paylaşımına gələn şərhlər də bunu təsdiq edir. Sosial şəbəkə istifadəçiləri qəza baş verən hissənin bir neçə gündür çökmüş vəziyyətdə olduğunu, bu səbəbdən qəzanın qaçılmaz olduğunu bildirib: “Qəza baş verəcək də, yarıtmaz işinizin nəticəsidir. İl ərzində yüz dəfə oranı qazıb tökürsünüz. Yenicə qazmışdınız, nə oldu yenidən? Normal iş görə bilmirsiniz, bizi də salmısınız çətin vəziyyətə. Neçə gündür ora çökük vəziyyətdə idi, hara baxırdınız bəs?”
Bir digər şəxs isə “Bu yer təzə qazılmışdı, dünən axşam artıq çökmüşdü, mən daxil neçə şəxs avtomobilinin altını vurdu. Belə olacağı bəlli idi, çox keyfiyyətsiz iş görürsünüz”, - deyə qeyd edib.
Başqa bir şikayətdə isə belə qeyd olunub: “Mən bu məhəllədə qalıram, bu yeri dəfələrlə qazıb təmir etmək olar, nə qədər yeyintidir bu, hər dəfə qaz, düzəlt asfaltla? Sizin səriştəli, işini bacaran bir işçiləriniz olmadı, bunu birdəfəlik düzəltmək üçün?”
Könül
Ölkə.Az
