Neft qiymətləri artımdan sonra sabitləşdi

Rusiya prezidenti Vladimir Putinin həftə sonu şərhlərinin Avropada geosiyasi gərginliyi artırması və investorların daha dəqiq məlumatlar axtarması neft qiymətlərini sabitləşdirib.

"Ölkə.Az" xəbər verir ki, "Brent" markalı neft fyuçerslərinin dəyəri 74,99 dollar/barel təşkil edib, ABŞ-ın Qərbi Texas (WTI) markalı nefti sessiyanın əvvəlində 69,92 dollara qalxdıqdan sonra 69,29 dollar/barel həddində sabitləşib.

Ümumilikdə, ötən həftə "Brent" 2,8%, "WTI" 3,8% bahalaşma nümayiş etdirmişdi.

Qeyd edək ki, qlobal bankçılıq sektorunda davam edən gərginlik investorları daha ehtiyatlı addımlar atmağa vadar edib. Bu fonda möhkəmlənən dollar isə bu valyuta ilə ifadə olunan malları bahalaşdıraraq neftə olan tələbi azaldır.

Həmçinin neft qiymətləri Rusiya prezidenti Vladimir Putinin Belarusda taktiki nüvə silahı yerləşdirəcəyi ilə bağlı şərhindən dəstək alıb. NATO isə bazar günü Putini "təhlükəli və məsuliyyətsiz" nüvə ritorikasına görə tənqid edib.

Rusiyanın baş nazir müavini Aleksandr Novak cümə günü bildirib ki, Moskva gündəlik xam neft hasilatını 500 min barel azaldaraq (gündəlik) 9,5 milyon barelə çatdırmaq hədəfinə çatmağa çox yaxındır.

Könül
Ölkə.Az