"FHN zəlzələ ilə bağlı mobil tətbiqi ortaya çıxara bilmir"

"FHN zəlzələ ilə bağlı mobil tətbiqi ortaya çıxara bilmir" - 7 ildir...

"Zəlzələ ilə bağlı xəbərdarlıq mesajı "Google"ın "Android" platformasından göndərildi. "Google" "Zəlzələ xəbərdarlığı" xidmətini xarici seysmik qurumların datalarından əldə edərək təqdim edir. "Google"ın xəbərdarlıq mesajından sonra əhali arasında xeyli çaşqınlığın, məlumatsızlığın, hətta dezinformasiyaların yayılması da müşahidə edilib. Heç kim soruşmur ki, bəs Fövqəladə Hallar Nazirliyinin (FHN) xəbərdarlığı, mesajları, mobil tətbiqləri və mobil xidməti haradadır?"

"Ölkə.Az" xəbər verir ki, bunu Azərbaycan İnternet Forumunun prezidenti, İKT üzrə ekspert Osman Gündüz deyib. O bidlirib ki, uzun illərdir Fövqəladə Hallar Nazirliyi "112 Mobil Xilasedici" tətbiqini hazırlaya bilməyib. "112" qaynar xətt xidməti aktiv olsa da, daha effektiv olan uyğun mobil tətbiq yoxdur:

"Xatırlayıram ki, 2016-cı ildə "ATL" şirkəti FHN-nin sifarişi ilə İOS və Android üçün belə bir resurs hazırlamışdı. Lakin sonralar bu mobil resurs hər iki platformadan yığışdırılıb. Daha sonra FHN bir neçə dəfə belə bir mobil resursun hazırlanması haqqında mesajlar versə də, indiyədək bu reallaşmayıb".

Ekspertin sözlərinə görə, digər ölkələrin əksəriyyətində belə bir mobil resurs aktivdir:

"112 Mobil Xilasedici" daha operativ reaksiya, ilkin məlumatlandırma və ilkin yardım, əks əlaqə, kordinatın müəyyən edilməsi və yönləndirilməsi, hadisə haqqında daha yetərli məlumatlar almaq üçün indiki zamanda ən effektiv və səmərəli həll yoludur".

"Maraqlıdır ki, hədsiz geniş resurslara, böyük bir İT idarəyə və komandaya malik olan FHN 7 ildir ki, balaca bir mobil tətbiqi ortaya çıxara bilməyib. Çox düşündürücü və təəssüfləndirici bir haldır", - deyə O. Gündüz əlavə edib.

Könül
Ölkə.Az