17 ölkədən 147 şirkət sərgilərdə iştirak edəcək
Bu il dünyanın 17 ölkəsindən 147 şirkət sərgilərdə iştirak edəcək
Bu gün Bakı Ekspo Mərkəzində tibb sahəsində regionun ən iri ixtisaslaşdırılmış tədbiri olan 20-ci Yubiley Azərbaycan Beynəlxalq Səhiyyə - “BIHE” sərgisi öz qapılarını ziyarətçilərin üzünə açacaq.
Bu il dünyanın 17 ölkəsindən 147 şirkət müasir səhiyyə sektoru üçün zəruri olan ən yeni məhsullarını nümayiş etdirlər.
Bu ölkələr arasında Azərbaycan, Belarus, Böyük Britaniya, Almaniya, İtaliya, Rusiya, Ukrayna, Türkiyə, İsveçrə, Çin, ABŞ və digər ölkələr yer alır. Sərgidə nümayiş etdirilən tibbi məhsul və xidmətlərin geniş spektrinə tibbi və laboratoriya avadanlıqları, stomatoloji avadanlıqlar, əczaçılıq preparatları, istehlak materialları, dezinfeksiya vasitələri, ortopedik məhsullar, yüksək texnoloji diaqnostika və müalicə metodları, tibbi texnika və s. daxildir.
Sərgidə ardıcıl olaraq ikinci ildir ki, Ümumdünya Tibbi Turizm Assosiasiyası (“Global Healthcare Travel Council” - “GHTC”) və Türkiyə Tibbi Turizm Assosiasiyasının (“Turkish Healthcare Travel Council” - “THTC”) dəstəyi ilə “Tibbi turizm” adlı yeni sektor inkişaf etdirilir. Bu il sərgidə xarici ölkələrdə tibbi xidmətlər təklif edən doqquz beynəlxalq klinika və mərkəz, eləcə də iki turizm agentliyi iştirak edəcək. Sərgidə tibbi turizm sektorunun iştirakçıları bu sahədə əməkdaşlıq üçün təkcə həkimləri deyil, turizm şirkətlərini də gözləyirlər.
“BIHE” sərgisinə paralel olaraq iki tədbir - 9-cu Azərbaycan Beynəlxalq “Stomatologiya” (“Stomatology Azerbaijan 2014”) və 8-ci Azərbaycan Beynəlxalq “Gözəllik və Estetik Tibb” (“Beauty Azerbaijan 2014”) sərgiləri keçiriləcək.
Sərgi Sentyabrın 27-dək davam edəcəkdir./Marja/
Ölkə.Az
