Neft fantastik şəkildə bahalaşma ərəfəsində - Müharibə ssenarisi
Neft qiymətləri üçün İsrail-Fələstin münaqişəsi fonunda 3 ssenari söyləmək olar. İlk ssenari neft qiymətlərinin 95-105 dollar aralığında olmasıdır. İkinci ssenari 105-120 dollar, üçüncü ssenari 120-150 dollar qiymət aralığıdır.
“Ölkə.Az” xəbər verir ki, bunu iqtisadçı ekspert Eldəniz Əmirov deyib. O bildirib ki, İsrailin rəsmən müharibəni bəyan etməsi ikinci ssenarini daha gözlənilən edir.
“Lakin proseslərə Səudiyyə Ərəbistanın da qatılacağı təqdirdə üçüncü ssenari gözləniləndir. Hətta ABŞ-ın müdaxiləsi vəziyyəti daha da kritik həddə çatdıra bilər və neft tarixinin ən böyük səviyəsinə qədər bahalaşa bilər. Çünki nefti 121 dollara çatdıran səbəb, onu 150 və daha yuxarı səviyyəyə yüksəldə bilər”.
Qeyd edək ki, İsrail və Fələstinin “Həmas” qrupu arasında hərbi toqquşmaların başlaması ötən gün nefti bahalaşdırıb. Belə ki, Yaxın Şərqdə siyasi qeyri-müəyyənliyin dərinləşməsi və tədarüklə bağlı narahatlıqların artması nefti 4 dollara yaxın bahalaşdırıb.
Könül
Ölkə.Az
