“Yelo Bank”ın Mərkəzi Banka borcu artıb

“Yelo Bank” ASC-nin Azərbaycan Mərkəzi Bankına borcu artıb.

“Ölkə.Az” bankın hesabatlarına əsasən xəbər verir ki, 2023-cü il sentyabrın 30-na bankın Mərkəzi Bank və dövlət fondları qarşısında öhdəlikləri 89,205 mln manat olub. Bu isə cari ilin ikinci rübü ilə müqayisədə 4%, ötən ilin eyni dövrü ilə müqayisədə 2% çoxdur.

Cari ilin üçüncü rübünün yekununda “Yelo Bank”ın cəmi aktivləri 912,136 mln manat təşkil edib ki, bu da ötən ilin eyni dövrü ilə müqayisədə 14,6% çoxdur. Müştərilərə verilmiş kreditlərin həcmi illik müqayisədə 29,6% artaraq 700,308 mln manat, depozit portfeli 16,7% artaraq 642,233 mln manat təşkil edib. Bankın cəmi öhdəlikləri isə 13,7% artaraq cari ilin sentyabrın 30-na 820,659 mln manat təşkil edib, cəmi kapitalı isə illik müqayisədə 24,2% artaraq 91,476 mln manata yüksəlib. 

Bankın yığılmış zərəri isə ötən ilin eyni dövrü ilə müqayisədə 5,1% azalaraq 295,217 mln manata enib.

Qeyd edək ki, “Yelo Bank” ASC-nin səhmlərinin 98,94%-i Marina Kulişovaya (Bankın Müşahidə Şurasının sədri), 0,96%-i Anar Həsənova (İdarə Heyətinin sədri), 0,10%-i isə “İSR Holdinq” MMC-yə məxsusdur. Bir müddət əvvəl milyader Vahid Ələkbərovun nəzarət etdiyi “Topaz İnvestment Limited” MMC bankdakı payını digər səhmdarlara ötürüb. Bununla da Banka birbaşa nəzarət V. Ələkbərovdan M. Kulişovaya keçib.

Könül
Ölkə.Az