Bu biznesmenlərə güzəştin ləğvi tənqid olundu
Gələn ildən Azərbaycanda muzdlu işçilərinin orta aylıq sayı 3-dən az olan və məcburi dövlət sosial sığorta haqları üzrə borcu olan mikro sahibkarlar gəlirlərinin 5%-i qədər deyil, 20%-i qədər vergi ödəyəcəklər. Başqa sözlə, onlar üçün 75%-lik vergi güzəşti və azadolma tətbiq edilməyəcək.
"Ölkə.Az" xəbər verir ki, bununla bağlı bir sıra tənqidlər səsləndirilir.
İqtisadçı ekspert Natiq Cəfərlinin sözlərinə görə, bütün dünyada hökumətlər mikro-kiçik sahibkarlara dəstək olmağa çalışırlar. Çünki bu ölkələrin sabitlik formulu büdcə gəlirlərinin 60-70%-nin kiçik-orta sahibkarlar tərəfindən təmin olunmasıdır. Məhz bu zaman sabit inkişaf yolu yaranır:
"Vergi Məcəlləsinin 102 və 106-cı maddələrinə təklif olunan dəyişikliyə əsasən gələn ildən mikro sahibkarların gəlir vergisinə 75% güzəşt qismən ləğv edilir. Bu güzəşt yalnız o sahibkarlara aid olacaq ki, onların azı 3 əməkdaşı olsun və sosial sığorta haqqı sahəsində borcu olmasın.
Bu addım vergi daxilolmalarını artırmaq üçünmü? Axı bu güzəştin ləğvi büdcə gəlirlərinin ciddi artımına səbəb olmayacaq, maksimum 40-50 mln. manat əlavə vəsait daxil ola bilər. Bəs nədən bu yola gedilir? Bu addımla mikro-sahibkarları, güya, əlavə 3 iş yeri açmağa “təşviq” edirlər ki, sonra desinlər ki, yeni iş yerləri açılıb. Mikro sahibkar da baxacaq ki, onun dövriyyəsi 200 mini keçən kimi ƏDV ödəyicisinə çevrilir, 200 mindən aşağı olanda, məsələn, ilə 20-30 min gəliri olacaqsa, bunun 4-6 min manatını vergi verməlidir. Oturub hesablayacaq - əgər 3 nəfər qohumunu formal, minimum əməkhaqqı ilə rəsmiləşdirsə, onların Sosial Müdafiə Fonduna ödənişləri il boyu 2-3 min arası olacaqsa, edəcək, yox əgər bu baş ağrısıdırsa, etməyəcək, qeyri-rəsmi fəaliyyətə üstünlük verəcək".
İqtisadçı deputat Vüqar Bayramov 75% güzəştin hədəfli tətbiqini təklif edib:
"Məşğulluq yaradan mikrosahibkarlıq subyektlərinə (il üzrə orta aylıq muzdlu işçi sayı 3 nəfərdən az olmayan və həmin işçilərə görə məcburi dövlət sosial sığorta haqlarını ödəyən) 75% güzəştin hədəfli tətbiqi, habelə əmtəəsiz əməliyyatlar aparan şəxslərə bu güzəştin tətbiq edilməməsi müzakirə olunur. Təklif edilir ki, bu məsələdə mərhələli yanaşma olsun və indiki mərhələdə 30 min manat gəlir əldə edən mikro sahibkarlara da 75%-lik güzəşt tətbiq olunsun. Məqsəd dövriyyəsi böyük olmayan və məsləhət, təlim və digər xidmət göstərən vətəndaşlarımızın həmin limit çərçivəsində bu güzəştdən istifadə etməsi imkanının yaradılmasıdır", - deyə millət vəkili qeyd edib.
Könül
Ölkə.Az
