Ermənistanın Rusiya-Ukrayna müharibəsindən qazancı

2022-ci ildə Ermənistanın xarici ticarət dövriyyəsi 68,8% artaraq 14,1 milyard dollara çatıb. İxrac isə 77,7% artaraq 5,3 milyard dollar olub. Bu, Ermənistanın son illər tarixində rekord artımdır.

"Ölkə.Az" xəbər verir ki, bunu iqtisadçı deputat Vüqar Bayramov deyib. Onun sözlərinə görə, səbəb Rusiya-Ukrayna müharibəsidir:

"Ermənistan bir sıra Rusiya məhsullarını ixrac edərək sanksiyalardan yayınmağa və daha çox gəlir əldə etməyə nail olub. Aylar üzrə müqayisə göstərir ki, artımın əhəmiyyətli hissəsi Rusiya-Ukrayna müharibəsi başladıqdan sonrakı dövrə təsadüf edib. Bu isə artım səbəblərinin re-eksport ilə bağlı olduğunu bir daha təsdiq edir".

Millət vəkili deyir ki, Luys Fondunun hesablamalarına görə, Ermənistan ixracatının ən azı 24,8%-i (1,3 milyard dollar) re-eksportdur və bunsuz həmin ölkənin ixracatı indikindən 2 dəfə az artardı. Mənzərə aydındır: "Rre-eksport və sanksiyalardan yayınmaq. Təəssüf ki, bir sıra aparıcı ölkələr bu reallığı da görmək istəmirlər".

Könül
Ölkə.Az