“Google”, “Facebook”, “Netflix” Azərbaycan üçün xidmətləri bahalaşdıra bilər”
Ötən ilin sonu Nazirlər Kabineti maraqlı bir sənəd qəbul edib. Hökumət nəhayət ki, ölkəmizdə internet üzərindən xidmət göstərən, elektron ticarətlə məşğul olan qlobal xarici şirkətləri də (Google, Facebook, Apple, Netflix, Twitter, Amazon və s.) vergiyə cəlb etməyi nəzərdə tutan yeni qaydaları təsdiqləyib. Bu Qaydalara görə, adıçəkilən şirkətlər Dövlət Vergi Xidmətinin (DVX) elektron platformasında vergi uçotuna düşməlidirlər.
“Ölkə.Az” xəbər verir ki, bunu İKT sahəsi üzrə ekspert Osman Gündüz deyib. O bildirib ki, qonşu ölkələr bir neçə illər öncədən “Google vergisi” adlanan bu sənədi qəbul ediblər:
“Statistikalarına nəzər salsaq görərik ki, bu ölkələrdə yüzlərlə xarici şirkətlər vergi uçotuna alınıblar və onlardan milyonlarla vergi toplanıb. Avropada isə on illər öncədən qlobal şirkətlər üçün bu praktika tətbiq edilirdi. Azərbaycanda isə Dövlət Vergi Xidməti bu vergini, yəni xaricdən alınan xidmət və məhsulara görə ƏDV-ni elə vergi ödəyicisi olmayan bizim vətəndaşlardan tuturdu. Yeri gəmişkən, bir çox qurumlar və şəxslər də bu vergini verməmək üçün xarici bank kartlarından ödənişlər edirdi. Yəni “Google”ın 100 manatlıq bir xidməti üçün vətəndaş bizim bank kartı ilə təxminən 120 manatadək ödəniş etməliydisə, xarici bank kartı ilə elə həmin 100 manatı ödəyirdi. İndi isə DVX vergiləri bu xidmətləri təqdim edən, uçota alınan xarici şirkətlərdən almağı hədəfləyib”.
Ekspert bunun doğru addım olduğunu düşünür: “Təəssüf ki, bu sahədə xeyli gecikdik, bu qaydalar çoxdan qəbul edilməli idi. Biz bu istiqamətdə əvvələr də hökumətə xeyli təkliflər vermişdik. Təəssüf ki, o zamanlar hökumət vergiləri xarici şirkətlərdən almaq əvəzinə elə öz vətəndaşlarımızdan almağa üstünlük vermişdi.
Görəsən, DVX vergiləri xarici şirkətlərdən ala biləcəkmi? Həmin qurumlardan hansılar indiyədək DVX-nin platformasında qeydiyyatdan keçiblər və VÖEN əldə ediblər ? İndiyədək “Google vergisi” ödəyən olubmu?”
“Maraqlı bir məqam həm də ondan ibarətdir ki, hökumətin bu addımından sonra vergi uçotuna cəlb olunan xarici şirkətlər Azərbaycan üçün nəzərdə tutulan xidmətləri bahalaşdıra bilər.
Yuxarıda adı çəkilən qaydalar qüvvəyə minəndən sonra bizim vətəndaşlardan bu tip vergilərin alınmasını nəzərdə tutan köhnə qaydaların ləğv edilməsi də məntiqli olardı”, - deyə O. Gündüz əlavə edib.
Könül
Ölkə.Az
