Bakıda şirkətin ləğvi elanı çaşqınlıq yaradıb

“Deloitte&Touche Regional Consulting Services Limited” şirkətinin Azərbaycandakı filialının ləğv olunduğu qeyd edilib. 

“Ölkə.Az” xəbər verir ki, bu barədə "Vergilər" qəzetində məlumat yer alıb.

Daha sonra isə rəsmi nəşrin elektron variantında sözügedən elan silinib.

Ölkə.Az-ın əldə etdiyi məlumata görə, şirkətin əməkdaşı ləğvedilmə ilə bağlı elanda səhvlərə yol verdiyi üçün mətn qəzetdən çıxarılıb. Buna qədər isə bəzi saytlarda bu haqda xəbər dərc olunub və şirkətin partnyorlarında çaşqınlıq yaradıb.

Ardınca tərəfdaşlara məlumat verilib ki, “Deloitte&Touche Regional Consulting Services Limited”in fəaliyyətində hər hansı dəyişilik yoxdur.

Qeyd edək ki, rəsmi açıq mənbələrə əsasən Bakı şəhəri Yasamal rayonu, Nizami, ev 96 ünvanında qeydiyyatda olan filial Azərbaycanda 10.12.2002 tarixində dövlət qeydiyyatına alınıb və qanuni təmsilçisi Kərimov Nuran Qüdrət oğludur.

“Deloitte” “Big four” adlanan 4 böyük audit şirkətindən biridir və 150-dən çox ölkədə fəaliyyət göstərir.

Ölkə.Az