Azərbaycanın ixracı niyə azalır?

Azərbaycanın ixracı niyə azalır? - AÇIQLAMA

2024-cü ilin ilk 2 ayında Azərbaycanın xarici ticarət dövriyyəsi 6 milyard 428 milyon dollar olub. İxracat 3 milyard 981 milyon, idxal isə 2 milyard 446 milyon dollardır. Bu müddətdə xarici ticarət dövriyyəsi faktiki qiymətlərlə 23,5%, real ifadədə 15%, o cümlədən idxal 19,9%, ixrac isə 12,7% azalıb. Qeyd edək ki, qeyri neft-qaz məhsullarının ixracı əvvəlki ilin eyni dövrü ilə müqayisədə faktiki qiymətlərlə 30,1%, real ifadədə 36,9% azalaraq 455,0 milyon dollar təşkil edib.

"Ölkə.Az" xəbər verir ki, iqtisadçı deputat VÜqar Bayramovun sözlərinə görə, bu ilin ilk 2 ayında neftin dünya bazar qiymətində əvvəlki ilin uyğun dövrü ilə müqayisədə kəskin fərq olmayıb:

"Belə ki, "Brent" markalı neftin bir barelinin qiyməti 2023-cü ilin yanvar ayında 82,5, fervral ayında 82,8, bu ilin ilk aylarında isə uyğun olaraq 80,12 və 83,48 dollar olub. 2023-cü ilin ilk 2 ayında 82,65, bu ilki dövr üçün isə 81,8 dollar orta qiymət qeydə alınıb. Göründüyü kimi neftin dünya bazar qiyməti ticarət dövriyyəsi azalması üçün təsirli faktor olmayıb".

Millət vəkili bildirib ki, neft hasilatındakı eniş ümumi ticarət dövriyyəsində azalmaya gətirib çıxarıb: "Neft hasilatı bu müddətdə 6,7% azalıb. Azərbaycan ixracatının 90%-ə yaxınını neft və qaz ixracatı təşkil etdiyi üçün ümumi ticarət dövriyyəsində azalmalar müşahidə olunub. İdxalın azalması mövsümi faktorlar və eləcə də, dövlət satınalmaları ilə bağlı yeni qaydaların tətbiqi ilə bağlıdır".

"Elektrik enerjisi və spirtli və spirtsiz içkilərin ixracatının azalması isə ümumi qeyri-neft ixracatına təsir göstərib. İqtisadiyyatın diversifikasiyası baxımından isə qeyri-neft-qaz ixracatının strukturunun və ixrac bazarlarının şaxələndirilməsi prioritet olaraq qalmaqdadır".

Könül
Ölkə.Az