“Azersun Holding”in bankına yatırılan depozitlər azalıb

“Azərbaycan Sənaye Bankı” ASC-nin 2024-cü ilin ilk yarısı üzrə maliyyə vəziyyəti məlum olub.

“Ölkə.az”ın məlumatına görə, sözügedən dövrə bankın cəmi aktivləri 718 mln 339 min manat təşkil edib. Bu isə ötən ilin eyni dövrü ilə müqayisədə 1,5% çoxdur.

Müştərilərə verilən kreditlərin həcmi isə illik müqayisədə 7,2% artaraq 258 mln 522 min manat olub.

Cari ilin iyunun 30-na depozit portfelinin həcmi 435 mln 426 min manat olub ki, bu da 0,3% azalma deməkdir. Bankın cəmi öhdəlikləri ötən ikinci rübü ilə müqayisədə 0,9% artaraq 601 mln 67 min manat təşkil edib. 

“ASB Bank”ın cəmi kapitalı isə 4,9% artaraq 117 mln 271 min manata çatıb.

Cari ilin yanvar-iyun ayları üzrə bankın xalis faiz gəlirləri 8 mln 396 min manat, xalis qeyri-faiz xərcləri isə 5 mln 150 min manat təşkil edib. Əməliyyat mənfəəti 3 mln 246 min manat olan bank aktivlər üzrə mümkün zərərlərin ödənilməsi üçün xüsusi ehtiyatların yaradılmasına ayırmalarını 382 min manat azaldıb. Mənfəətindən 729 min manat vergi ödəyən bank 2024-cü ilin ilk yarısını 2 mln 899 min manat xalis mənfəətlə başa vurub.

Xatırladaq ki, bankın səhmlərinin 98,4252%-i “Anadolu Investment Company” MMC-yə, 1%-i Leyla Goozal Kurta, 0,5748%-i isə "Azərbaycan Sənaye Lizinq" MMC-yə məxsusdur.

Könül
Ölkə.az