Azərbaycan neft gəlirlərini unutmalıdır

Neftin dünya bazarında qiyməti hər keçən gün daha da aşağı düşür.

Dövlət büdcəsində neft gəlirləri pessimist senari üzrə 40 dollar götürülsə də, neftin dünya bazarında hazırki qiyməti 32 dollardır. Bu isə ölkə gəlirlərinin kəskin azalması deməkdir.

Baş verən iqtisadi kataklizmləri iqtisadçı ekspert Vüqar Bayramov Ölkə.Az-a verdiyi açıqlamasında şərh edib:

"Əslində Maliyyə Nazirliyi neftin dünya bazarındakı pessimist qiymətini 40 dollardan aşağı götürmüşdü. Mərkəzi Bankın son hesabatından da bəlli olur ki, artıq Mərkəzi Bank 30 dollar üzərindən öz fəaliyyətini həyata keçirməyə çalışacaq. Böyük ehtimalla hökumət də öz fəaliyyətini 30 dollar üzərindən quracaq. Ancaq neftin dünya bazarında qiymətinin 30 dollarda dayanacağı bəlli deyil. Qiymətin aşağı düşməsi birmənalı şəkildə ölkənin gəlirlərinin aşağı düşməsinə gətirib çıxaracaq. Neftin dünya bazarında qiymətinin aşağı düşməsi fonunda çətinlikdən çıxmağın yeganə yolu genişmiqyaslı islahatların aparılmasıdır. Nəzərə alsaq ki, Azərbaycan neft ölkəsidir. Bu gün neft ölkələrinin əksəriyyətində xüsusi anti-böhran tədbirlər planı hazırlanır. Azərbaycanın da anti-böhran tədbirləri planı hazırlamağa ehtiyacı var. Bu proqramın əsasında hökumətin fəaliyyətinin qurulması, o cümlədən məzənnə siyasəti, o cümlədən digər iqtisadi siyasətlərə ehtiyac var. Kadr dəyişikliyi vacibdir.

Azərbaycan neft sektorunu və neft gəlirlərini unutmalıdır. Azərbaycan yalnız qeyri-neft sektoru əsasında iqtiadiyyatını qurmalıdır. Qeyri-neft sektorunun inkişaf etdirilməsi neftin dünya bazarında qiymətininin baha olduğu vaxt edilməli idi. Etiraf etməliyik ki, biz o şansı itirmişik. Ancaq bu o demək deyil ki, hər şeyin sonudur. Neftin dünya bazarında qiymətinin ucuz olduğu bir vaxtda anti-böhran proqramı və islahatlar aparmaqla ölkəyə daxil olan valyutanın həcmini artırmaq mümkündür".

Qeyd edək ki, dövlət büdcəsində neftin 1 bareli 50 dollar, optimist senari ilə isə 60 dollar nəzərdə tutulub.

Səxavət Məmməd
Ölkə.Az