Dolların satışı \"ucuzlaşdı\"

Maliyyə bazarlarındakı təlatüm davam edir.

Bazar günü şəhərin demək olar ki, heç bir valyutadəyişmə məntəqəsinin işləməməsindən sonra Ölkə.Az əməkdaşı həftənin ilk günü vəziyyəti öyrənmək üçün paytaxt "exchange" və banklarında müşahidələr aparıb.

Ötən həftə Mərkəzi Bankın valyuta satışında kommersiya banklarına verdiyi sərbəstlik ABŞ valyutası və avronun satış qiymətinin yenidən qalxmasına səbəb olmuşdu. Mərkəzi Bankın 2015-ci il dekabr ayının 21-ə müəyyən etdiyi 1 dollara görə 1,55 manat məzənnəsi aradan keçən günlər ərzində 1,80-1,90 manatdan satılmağa başlandı.

Əhali arasındakı ciddi çaşqınlıq yaradan bu hala şənbə günü prezidentin Nazirlər kabinetinin növbədənkənar iclasında verdiyi göstərişlərdən sonra Mərkəzi Bankın müdaxilə etməsi gözlənilirdi. Mərkəzi Bankın kommersiya banklarına göndərdiyi məktubda dolların satış kursunun maksimum 1,62 manatı keçməməsi bildirilib. Lakin kommersiya banklarının bir çoxunun müəyyən etdiyi məzənnəni bu gün üçün 1 dollara görə 1,62 manat olsa da məntəqələrdə heç kəsə dollar satılmır.

Hələlik Mərkəzi Bankdan bu vəziyyətə rəsmi münasibət bildirilməyib.

Ölkə.az