İqtisadçı əhalinin bank borclarından danışdı

Ölkədə bir neçə bank bağlandı.

Bankların bağlanma prosesinin davam edəcəyi gözlənilir. Vətəndaşları isə bağlanan banklara olan kreditlərin necə ödənməli olacağı maraqlandırır. Bəziləri elə hesab edir ki, bank bağlandısa, deməli kredit ödənməyəcək.

Bununla bağlı iqtisadçı-ekspert Vüqar Bayramov Ölkə.az-a danışıb:

"Ötən il sizə müsahibəmdə demişdim ki, 10 bank bağlana bilər. Hələ bir neçə bank da bağlanacaq. Bankların bağlanması gözlənilən idi. Ötən ilin əvvəllərində Azərbaycanda 10 bankın müflisləşmə həddində olduğu bilinirdi. Bu proses onu göstərir ki, sonuncu devalvasiyadan sonra müflisləşmə təhlükəsi olan bankların sayı artdı. Artıq əvvəlki kimi 43 bankdan 10-u deyil, bizim dəyərləndirməmizə görə bankların sayı 30-a düşə bilər. Azərbaycandakı bank sektorundakı mövcud vəziyyəti və iqtisadi vəziyyəti nəzərə alsaq, müəyyən müddətdən sonra ölkəmizdə bankların sayının 20-yə düşməsi gözlənilir. Mərkəzi Bank əgər bank sektorunu liberallaşdırarsa və xarici bankların ölkəyə daxil olmasına imkan verərsə, o zaman bankların sayı ciddi şəkildə azalacaq.

Banklar bağlansa da kredit ödənişlərində heç bir dəyişiklik olmayacaq. Bəzi vətəndaşlarımız belə düşünür ki, bank bağlandısa krediti qaytarmayacaq. Kredit qaytarılacaq. Mövcud qanunvericiliyə əsasən bank müflis olandan sonra agent bank müəyyənləşdirilir. Müflis olmuş bankın öhdəlikləri və aktivləri agent banka transfer edilir. Bu isə o deməkdir ki, müştəri krediti agent banka ödəyəcək və şərtlərində hər hansısa bir dəyişiklik olmayacaq. O kreditin faizi nə arta bilər, nə də azala bilər. Vətəndaş artıq ödənişi yeni agent banka ödəyəcək. Agent bank kredit şərtlərində hər hansısa bir dəyişiklik edə bilməz. O halda dəyişiklik edə bilər ki, müştərinin razılığı olsun. Müştərinin razılığı olmadan agent bankın qərar qəbul etmək hüququ yoxdur".

Səxavət Məmməd
Ölkə.az