Mətn ölçüsü:
  • 100%

“Əsrin müqaviləsi”nin 20 illiyi münasibətilə rəsm müsabiqəsi elan edilib

Ümumi mükafat fondu 20 min manatdır.

Sentyabrın 20-də Azərbaycanın müasir enerji strategiyasının həyata keçirilməsində mühüm rol oynamış “Əsrin müqaviləsi”nin imzalanmasının 20 ili tamam olur. Bu əlamətdar hadisə münasibətilə “Art Energy-20” rəsm müsabiqəsi elan edilib.
Ölkə.Az istinadla bildirir ki, müsabiqəyə təqdim olunan əsərlər yüksək bədii tələblərə cavab verməklə yanaşı, Azərbaycan neft sənayesinin tarixini, “Əsrin müqaviləsi”nin, habelə Bakı-Tbilisi-Ceyhan, “Azəri-Çıraq-Günəşli”, “Şahdəniz” layihələrinin respublikamızın sosial və iqtisadi inkişafındakı rolunu, neftçilərin fədakar əməyini və ölkə iqtisadiyyatının inkişaf dinamikasını tərənnüm etməlidir. SOCAR-ın, Mədəniyyət və Turizm Nazirliyinin, Rəssamlar İttifaqının nümayəndələrindən və tanınmış rəssamlardan ibarət münsiflər heyəti əsərlərə baxış keçirəcək və qaliblər açıq səsvermə yolu ilə müəyyən olunacaq. Müsabiqəyə rəngkarlıq, qrafika, kiçik həcmli heykəltəraşlıq janrlarında hazırlanmış sənət əsərləri təqdim edilə bilər. Müsabiqənin ümumi mükafat fondu 20 min manatdır.
Müsabiqədə iştirak etmək üçün ərizə - “iştirakçı vərəqi” avqustun 1-dən başlayaraq sentyabrın 1-dək qəbul olunur. Hər müəllif müsabiqəyə yalnız bir sənət əsəri təqdim edə bilər./azərtac/

Ölkə.Az