Azərbaycan neft ixracını artırıb, qaz ixracını isə azaldıb
2016-cı ilin birinci yarısında Azərbaycan 17 milyon 973,3 min ton neft ixrac edib, bu da ötən ilin analoji dövrünün göstəricisindən 1,4% çoxdur.
Ölkə.Az bu barədə “İnterfaks-Azərbaycan”a istinadən xəbər verir.
Azərbaycandan ixrac olunan neftin ümumi dəyəri 4 milyard 774 milyon 918,2 min dollar təşkil edib (аzalmа 30,5%).
Birinci yarımillik ərzində 2 milyard 910 milyon 73,3 min dollar məbləğində ixraca yönələn bəyan olunmuş neftin həcmi 10 milyon 551,5 min ton təşkil edib.
2015-ci ildə Azərbaycandan 32 milyon 520 min ton neft ixrac olunub.
Azərbaycan 2016-cı ilin I yarısında 4 milyard 62,1 milyon kubmetr təbii qaz ixrac edib ki, bu da 2015-ci ilin analoji dövrünün göstəricisindən 7,8% azdır.
Azərbaycandan ixrac olunan qazın ümumi dəyəri 706 milyon 333 min dollar (azalma 30,6%) təşkil edib.
Hesabat dövründə sadələşdirilmiş gömrük bəyannamələri üzrə rəsmiləşdirilmiş 113 milyon 972,6 min dollar dəyərində 714,4 milyon kubmetr qaz ixrac edilib.
Ötən il 8 milyard 405 milyon 244,65 min kubmetr qaz ixrac olunub.
Hazırda Azərbaycan Dövlət Neft Şirkəti (SOCAR) tərəfindən qaz Rusiya, İran və Gürcüstana, eləcə də “Şahdəniz” konsorsiumu tərəfindən Bakı-Tbilisi-Ərzurum qaz kəməri ilə Gürcüstana və Türkiyəyə ixrac edilir.
