BOTAŞ bu il idxal etdiyi qazın həcmini açıqladı
Türkiyənin “Boru Hatları ile Petrol Taşıma AŞ” (BOTAŞ) dövlət şirkəti bu ilin yanvar-iyul ayları ərzində həyata keçirdiyi təbii qaz idxalının həcmini açıqlayıb.
Ölkə.Az-ın “APA-Economic”-ə istinadən verdiyi məlumata görə, bu ilin yeddi ayı ərzində şirkət 21 mlrd. 769 mln. kubmetr təbii qaz idxal edib.
Şirkətin 2015-ci il ərzində həyata keçirdiyi təbii qaz idxalının həcmi isə 41 mlrd. 300 mln. kubmetr təşkil edib. Ümumilikdə ötən il ərzində Türkiyə xaricdən 48 mlrd. 427 mln. kubmetr qaz alıb.
Bu il ümumilikdə 49 mlrd. kubmetr təbii qazın idxal olunması planlaşdırılıb. Ancaq bu rəqəmin qış aylarının yumşaq keçməsi səbəbindən 46 mlrd. kubmetr səviyyəsində qalacağı proqnozlaşdırılır.
Qeyd edək ki, Türkiyənin BOTAŞ şirkəti Bakı-Tbilisi-Ərzurum qaz boru kəməri vasitəsilə Azərbaycandan da təbii qaz nəql edir.
