OPEK-dən neftin qiyməti ilə bağlı
OPEK təşkilatına üzv olan ölkələrin neftinin orta qiyməti 2040-cı ilə qədər nominal ifadədə 155 dollar/barelə (2015-ci ilin qiymətləri ilə 92 dollar/barel) yüksələ bilər.
Ölkə.Az-ın məlumatına görə, “Report”un “TASS” agentliyinə istinadən verdiyi xəbərə görə, bu barədə OPEK-in 2040-cı ilə qədər neft bazarı ilə bağlı hazırladığı hesabatda (World Oil Outlook) deyilir.
Sənəddə, həmçinin qeyd olunub ki, 2016-cı ildə OPEK neftinin orta qiyməti 40 dollar/barel təşkil edəcək və 2021-ci ilə qədər hər növbəti ildə 5 dollar/barel artım göstərərək nominal ifadədə 65 dollar/barelə (2015-ci ilin qiymətləri ilə 60 dollar/barel) çatacaq. “Bu ehtimallar neft bazarında vəziyyətin tədricən yaxşılaşmasına əsasən verilib”, - deyə hesabatda bildirilib.
Kartelin ekspertləri hesab edirlər ki, bu qiymətləndirmələr proqnoz deyil və OPEK ölkələrinin arzuladığı neft qiymətləri hesab edilməməlidir: “Bu, sadəcə, ehtimallardır və bunun əsasında OPEK-in analitikləri proqnozlar hazırlayırlar”.
Qeyd edək ki, OPEK nefti təşkilata üzv olan ölkələrin bütün neft markalarının bazar qiymətinin orta arifmetik qiyməti hesab olunur.
