Vüqar Bayramov: \"Azərbaycanda xüsusi iqtisadi zonalar yaradılmalıdır\"

Ölkəmizdə biznes qurmaq, sahibkarlıq fəaliyyəti ilə məşğul olmaq üçün şərait necədir?

Bu məsələ ilə əlaqədar Ölkə.az iqtisadçı-ekspert Vüqar Bayramovun fikrini öyrənib:

"Sahibkarlıq fəaliyyətinə yersiz müdaxilələrin aradan qaldırılması olduqca vacibdir. Həqiqətən də, yersiz müdaxilələrin aradan qalxmasına ehtiyac var. Bu ona görə vacibdir ki, bu kimi hallar iş adamlarının fəaliyyətinə birmənalı şəkildə mənfi təsir edir. Əgər bütün bu maneələr aradan qalxarsa, bu iş adamlarının sərbəst şəkildə biznes fəaliyyəti ilə məşğul olmasına xidmət edəcək.

Biznes mühitinin yaxşılaşdırılması üçün biz xüsusi iqtisadi zonaların yaradılmasını təklif edirik. Həmin zonalarda sahibkarlar və iş adamlarına xüsusi şərtlərlə fəaliyyət göstərilməsi imkanları yaradılmalıdır. İdxal-ixrac əməliyyatlarının sadələşdirilməsi, onların bir qisminin "Asan Xidmət" vasitəsi ilə həyata keçirilməsini təklif edirik. Belə olarsa, bu sahədə şəffaflığın artmasının şahidi olacağıq.

Ölkədə biznes sisteminin əvvəlki illərlə müqayisədə yaxşılaşması müşahidə edilir, amma bununla yanaşı qeyd etdiyim istiqamətlər üzrə islahatların aparılmasına ehtiyac var.
Ümumilikdə sahibkara verilən kreditlərin həcmini müəyyənləşdirsək, il ərzində 247 mln manat güzəştli kreditlərin verilməsini görərik. 8 mln manatdan artıq vəsait Azərbaycan Respublikasının Sahibkarlığa Kömək Milli Fondu tərəfindən müəyyən edilib. Bu sahədə kreditlərin verilməsi mexanizmində dəyişikliklər edilməsini təklif edirik.

Azərbaycan regionda sahibkarlara böyük həcmdə kredit verən azsaylı ölkələrdən biridir. Bununla yanaşı təbii ki, mexanizmin dəyişdirilməsi və kiçik kreditlərin verilməsi olduqca vacibdir. Sahibkarlara kiçik həcmdə qrantların təqdim edilməsinə ehtiyyac var. Bu həm də kiçik bizneslərin genişlənməsinə səbəb olacaq".

Qeyd edək ki, Azərbaycan Respublikasının Sahibkarlığa Kömək Milli Fondu İqtisadiyyat və Sənaye Nazirliyinin nəzdində fəaliyyət göstərir. Fondun məqsədi Azərbaycan Respublikasında sahibkarlığın, xüsusilə kiçik və orta sahibkarlığın inkişafına və əhalinin işgüzarlıq fəaliyyətinin artırılmasına kömək göstərməkdən, onlara maliyyə dəstəyi verməkdən ibarətdir.

Fatimə İbrahimova
Ölkə.az