“İşsizliyin artmasına səbəb olacaq”

“Elektrik enerjisi və təbii qazın qiymətlərinin qaldırılması ilə bağlı Tarif Şurasının qəbul etdiyi qərar Azərbaycanda işsizliyin artmasına səbəb olacaq".

Ölkə.Az-ın məlumatına görə, bunu Azərbaycan Həmkarlar İttifaqları Konfederasiyasının sədri, millət vəkili Səttar Mehbalıyev bildirib.

S.Mehbalıyev deyib ki, elektrik enerjisi və qazın qiymətinin qaldırılması ölkədə işsizliyin sayının artırılmasına təkan verəcək:

“Artıq bununla bağlı iş adamaları mənə müraciət ediblər və gələcək fəaliyyətlərində ciddi problemin olacaqlarını dilə gətirirlər. Misal üçün bir şəxs iki hektara yaxın istixanasının olduğunu və təkcə indiyədək ayda enerji daşıyıcılarına 25 min manatadək vəsait xərclədiyini bildirib. Bundan sonra isə bu xərclər iki dəfə artaraq 50 min manat təşkil edəcək. Nəticədə iş adamı da fəaliyyətini dayandıracaq və işçiləri ixtisara salacaq. Bu da işsizliyin artmasına səbəb olacaq. Bəs onlar hara gedəcək”.

Azərbaycanda bir çox müalicə müəssisələrinin özəlləşdirlməyə çıxarılması məsələsinə də toxunan S.Mehbalıyev qeyd edib ki, indi ayrı-ayrı xəstəxanalar və digər bu kimi müəssisələr özəlləşdirməyə çıxarılır:

“Ancaq ən azı özəlləşməyə çıxarılan müəssisənin işçilərinə alternativ iş yerləri təklif olunmalıdır. Onlar iş yerləri ilə təmin olunmalıdır ki, sonra müəssisə özəlləşməyə çıxarılsın. Bu gün özəlləşməyə çıxarılacaq kifayətə qədər istifadəsiz müəssisələr var qoy onları çıxarılsın. Bu gün Dövlət Neft Şirkətinə məxsus yetərincə istifadəsiz istirahət mərkəzləri var. Yaxşı olar ki, onlar özəlləşdirməyə çıxarılsın. Müəssisə özəlləşən zaman insan amili öndə olmalıdır”.

Zaur Əziz
Ölkə.Az