Avropa İnvestisiya Bankı Azərbaycanla ilk sazişini imzaladı

Cümə günü Bakıda "AccessBank" və Avropa İnvestisiya Bankı (EIB) arasında 25 milyon avro məbləğində kredit sazişi imzalanıb

Sazişi "AccessBank"ın baş direktoru Mixael Hofmann, bankın İdarə Heyətinin üzvü Şakir Rəhimov və EIB-in vitse-prezidenti Vilhelm Molterer imzalayıblar.

"AccessBank"ın baş direktoru deyib: "Bu, bizim bankımız üçün çox mühüm layihədir. Biz iri məbləğdə kredit verən tərəfdaşımızın dəstəyini yüksək qiymətləndiririk.

Biz EIB kimi nüfuzlu maliyyə institutunun Azərbaycanda ilk kredit vermək üçün bizi seçdiyinə görə çox fəxr edirik. EIB tərəfindən ayrılan vəsait ölkədə dinamik inkişaf edən kiçik və orta biznesin (KOB) kreditləşdirilməsi üçün bankın fəaliyyətinin inkişafına böyük töhfə verəcək".

EIB-in vitse-prezidenti Vilhelm Moltererin sözlərinə görə, bu kredit KOB sektorunun uzunmüddətli maliyyələşdirməyə çıxışını asanlaşdıracaq və bunula da ölkədə özəl sektoru dəstəkləyəcək.

Öz növbəsində, bu, KOB sektorunun güclənməsinə və Azərbaycan hökumətinin ölkə iqtisadiyyatının şaxələndirilməsi və modernləşdirilməsi ilə bağlı gələcək planlarının reallaşdırılmasına kömək edəcək.

Verilən vəsait ölkədə özəl kiçik və orta müəssisələr tərəfindən həyata keçirilən layihələrin maliyyələşdirilməsinə yönəldiləcək.

EIB 2014-cü il yanvarın 15-də Azərbaycan hökuməti ilə çərçivə sazişi imzaladıqdan sonra ölkədə kredit əməliyyatlarını həyata keçirmək imkanı əldə edib.

“AccessBank” 2002-ci ildə QDİƏT, AYİB, BMK, KfW, Almaniyanın LFS Financial Systems (LFS) məsləhətçi şirkəti və “AccessHolding” kimi təşkilatlar tərəfindən yaradılıb. “AccessBank” xırda və KOS müəssisələrinin kreditləşdirilməsi ilə məşğul olur. Bank Azərbaycanda geniş filial şəbəkəsinə malikdir.(Trend)

Ölkə.Az