BVF-nin Azərbaycanda bir neçə bankın bağlanacağı ilə bağlı proqnozuna

Beynəlxalq Valyuta Fondunun proqnozunda deyilir ki, Azərbaycanda kapitallaşma və dövlət tərəfindən problemli kreditlərin alışı prosesi davam edir. Lakin kapitallaşma ilə bağlı yeni planların işlənməsindən sonra bir neçə bank da bağlana bilər.

Beynəlxalq Valyuta Fondunun Azərbaycanda fəaliyyət göstərən bir neçə bankın fəaliyyətinin ləğv edilməsi ilə bağlı proqnozuna iqtisadçı ekspertlər Vahid Əhmədov və Natiq Cəfərli Ölkə.Az-da münasibət bildiriblər:

Millət vəkili, iqtisadçı ekspert Vahid Əhmədov: "Beynəlxalq Valyuta Fondunun Azərbaycandakı bir neçə bankın lisenziyasını ləğv ediləcəyi ilə bağlı proqnozu bizim üçün yeni bir məlumat deyil. Bununla bağlı dəfələrlə proqnoz vermişik. Bankların sağlamlaşdırılması ilə dövlət başçısının göstərişinə uyğun olaraq, hansı banklarda ciddi probemlər yaranıbsa, o banklarda çox ciddi tədbirlər həyata keçirilir. Hesab edirəm ki, ilin sonuna qədər bir neçə bank bağlanacaq. Bəzi bankların birləşmə ehtimalı da var. Yaxın zamanda "AtaBank" ASC və "Caspian Development Bank” ASC birləşdi. Problemləri çox olan bankların birləşmə ehtimalı var, ancaq bu çox azdır. İstərdik ki, banklar bağlanmaqdan daha çox birləşsinlər. Çünki banklar birləşəndə ciddi problemlər yaranmır, ancaq bağlananda əhali üçün də, banklar üçün də ciddi problemlər yaranır. Beynəlxalq Valyuta Fondunun proqnozu ilə razıyam.

Hansı bankların bağlanacağını demək olmaz. Çünki ciddi analizlər gedir. Maliyyə Bazarına Nəzarət Palatası hansı bankların bağlanacağını müəyənləşdirəcək".

İqtisadçı ekspert Natiq Cəfərli: "Əslində Azərbaycandakı bankların hamısında problem var. Problemi olmayan bank yoxdur. Bu problemin az, çox olması məsələsi var. Problemli kreditlərdəki artım əsas problem olaraq qalıb. Banklar verdikləri kreditləri geri ala bilmirlər. Buna görə də, banklar yenidən kreditləşməyə başlaya bilmirlər. Çünki banklar büdcəsində sərbəst pul vəsaiti az qaldığı, verilən kreditlər geri ödənmədiyi üçün yeni kreditləşməyə gedə bilmirlər. İqtisadi aktivliyin zəif olması da yüksək faizlə iş adamlarının və fiziki şəxslərin kredit götürməyə marağını azaldıb. Buna görə də, bankların hamısında problemlər var.

Daha kiçik bankların bağlanması və birləşdirilməsi gündəmə gələ bilər. Bu belə də olacaq. Bağlanma ehtimalı olan bankların adını çəkmək doğru olmaz. Mediada hansısa bankın adının çəkilməsi panikaya səbəb ola bilər".

Neçə bankın bağlanacağı ehtimalına gəldikdə isə iqtisadçı ekspert bildirdi ki, 10-15 bankın problemləri daha ciddidir:

"Çox güman ki, bu ilin sonuna qədər 10-15 bankın ya bağlanması, ya da birləşdirilməsi gündəmə gələcək".

Səxavət Məmməd
Ölkə.Az