“Fitch” bul il Azərbaycanda ipoteka kreditlərinin artacağını proqnozlaşdırıb
“Fitch” beynəlxalq reytinq agentliyi Azərbaycan İpoteka Fondunun (AİF) ipoteka portfelinin 2017-ci ildə 30-40% arta biləcəyini proqnozlaşdırır.
"Ölkə.Az" Report-a istinadən xəbər verir ki, bu barədə “Fitch”in hesabatında qeyd edilib.
Hesabata görə, 2016-cı ildə Fondun ipoteka portfelində cüzi azalma baş verib. Bu ilin əvvəlinə Fondun aktivləri 537 mln. manat təşkil edib. Cari ildə isə Fondun kapitalına 50 mln. manat əlavə edilib. Bununla yanaşı, AİF-in 200 mln. AZN istiqraz yerləşdirməsi gözlənilir.
Agentlik bildirib ki, AİF-in əməliyyatlarının sayı 2016-cı ildə azalsa da, ilin sonundan etibarən yenidən təşkilatlanma prosesindən sonra fəaliyyəti bərpa olunub. “Fitch” həmçinin AİF-in reytinqini Azərbaycanın suveren reytinqinə (“BB+”/neqativ) uyğun yeniləyib. Agentlik bunu, Fondun dövlətlə sıx əlaqəli və onun nəzarətində olması ilə əlaqələndirir.
