Millət vəkili vaksinasiya problemindən danışdı: "Təcili qərar qəbul etmək lazımdır"

“Bu da başqa bir biabırçılıq. Gürcüstan vətəndaşı olan çoxlu soydaşımız var. Artıq illərdir evləri-eşikləri burada, onlara vaksin vurulmur ki, bəs portalda adınız çıxmır. Müvəqqəti yaşamaq hüququ barədə sənəd tələb edirlər. Çoxunda da bu sənəd yoxdur. Onlar nə etsinlər?”

Ölkə.Az xəbər verir ki,bunu millət vəkili Fazil Mustafa deyib. Müvafiq qurumlara çağırış edən deputat bildirib ki, onların siyahısı hökumətdə olmalıdır:

"Məhz faktiki Azərbaycanda yaşayan Gürcüstan vətəndaşı olan soydaşlarımıza vaksin vurulmalıdır. Onlar bizim qanımızdan, canımızdan deyilmi? Bəlkə onları xəstəxanaya müalicəyə də götürməyək? Bu nə duyarsızlıqdır. Sabah bununla bağlı TƏBİB-ə və Səhiyyə Nazirliyinə deputat sorğusu ilə rəsmi müraciət də edəcəyəm. Üst-üstə soydaşlarımızın sayı olsun 100-150 min. Buna vaksinimiz yetməyəcək? Təcili yığışıb bir qərar qəbul etmək lazımdır. Operativ Qərargah da bu ciddi məsələni diqqətdə saxlamalıdır”.

Əmək Hüquqlarının Müdafiəsi Liqasının rəhbəri, sosial məsələlər üzrə ekspert Sahib Məmmədov isə bildirib ki, onlar burada (Azərbaycanda) müvəqqəti olma (90 gün) sənədi ilə yaşayanlardır:

“Hər 90 gündən bir sərhədi keçib qayıdırlar. Bizim turizm qurumu da onları bir ildə 4 dəfə turist kimi qeyd edib statistika düzəldir. Müvəqqəti və daimi yaşamaq hüququ olanların adı sistemdə var.

Problem odur ki, bu şəxslər ölkəyə turist kimi daxil olur, 15 gün ərzində DMX-ə bir elektron bildiriş verib şərti ünvanlar göstərməklə 90 gün ölkədə qalırlar. Heç onların dəqiq ünvanını bilən yoxdur. Odur ki onlar barədə elektron sistemdə məlumat yoxdur. Yəni məlumat var ki, sərhədi keçiblər biz tərəfə və hələ ölkədədirlər. Bu problemi necə həll etmək olar? Sadəcə şəhərdə müxtəlif yerlərdə bu kateqoriyadan olan əcnəbilər üçün xüsusi yerlər ayırıb elan vermək olar ki, könüllü gəlib vaksin qəbul etsinlər. Biz onlara soydaş deyirik, hüquq isə əcnəbi və ya vətəndaşlığı olmayan şəxs. Onlara fərqli münasibət göstərəsi olsaq, gərək konvensiyanı denonsasiya edək. Müvəqqəti olma statusunda olan yalnız Gürcüstan vətəndaşları deyil. Gərək kompleks yanaşma olsun”.