Küçədə səs-küy saldı, etiraz edənin boğazını kəsdi-Ağstafada qətl

Ağstafa rayonunda həmkəndlisini bıçaqlayaraq qətlə yetirməkdə təqsirli bilinən Tural Heydanovun cinayət işi üzrə ibtidai istintaq başa çatıb.

"Ölkə.Az" xəbər verir ki, cinayət işinin materialları baxılması üçün Gəncə Ağır Cinayətlər Məhkəməsinə göndərilib.

Cinayət işi hakim Məhəmməd Bağırovun icraatına verilib.

İş üzrə məhkəmə hazırlıq iclası oktyabr ayının 12-nə təyin olunub.

Qeyd edək ki, hadisə rayonun Dağkəsəmən kəndində baş verib.

Kənd sakini, 1991 ci il təvəllüdlü Heydanov Tural Misir oğlu sözügedən kənddə küçədə səs-küy salıb. Bu zaman kənd sakini olan 1977-ci il təvəllüdlü Şəmilov Hürriyyət Qavrel oğlu ona iradını bildirib. Bu zaman hər iki şəxs arasında mübahisə yaranıb. Nəticədə Tural Heydanov Hürriyyət Şəmilovun boğaz nahiyəsindən bıçaqla vuraraq onu qətlə yetirib.

Faktla bağlı rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, müvafiq ekspertizalar təyin edilib

Qətli törətməkdə şübhəli bilinən şəxs saxlanılıb.

Tural Heydanov cinayətin aləti olan bıçağı istintaqa təqdim edib, müdafiəçinin iştirakı ilə dindirilərkən törətdiyi cinayəti etiraf edib.

Ölkə.Az