Tovuzda mağazaya oğurluğa girən gənc qətlə yetirilib-MƏHKƏMƏ

Tovuz rayonunda qətl hadisəsi törətməkdə təqsirli bilinən Aftandil Sultanovun cinayət işi üzrə ibtidai istintaq başa çatıb.

"Ölkə.Az" xəbər verir ki, cinayət işinin materialları baxılması üçün Gəncə Ağır Cinayətlər Məhkəməsinə göndərilib.

Cinayət işi hakim Nural Əliyevin icraatına verilib.

İş üzrə məhkəmə hazırlıq iclası oktyabrın 22-nə təyin olunub.

Qeyd edək ki, hadisə rayonun Abulbəyli yaşayış massivində qeydə alınıb. Rayonun Bozalqanlı kənd sakini, 1992-ci il təvəllüdlü Mehdiyev Elnur Valeh oğlu Abulbəyli kənd sakini, 1984-cü il təvəllüdlü Sultanov Aftandil Mahir oğlunun həyətindəki mağazaya oğurluğa girib. A.Sultanov mağazadakı kamera vasitəsilə onu görüb və evdən bıçaq götürərək mağazaya gəlib. A.Sultanov mağazanın giriş qapısında E.Mehdiyevlə rastlaşıb və nəticədə əlbəyaxa dava düşüb. Dava zamanı A.Sultanov əlinədi bıçaqla E.Mehdiyevin ürəyindən bir-neçə bıçaq zərbəsi vurub. E.Mehdiyev A.Sultanovun əlindən çıxaraq rayonun Ə.Cavad küçəsi istiqamətində qaçıb.

Səhər saatlarında E.Mehtiyevin meyiti Ə.Cavad küçəsindəki kanaldan tapılıb.

A.Sultanov şübhəli şəxs qismində saxlanılıb. Faktla bağlı Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb.

Ölkə.Az