Qubada baş vermiş davada qətl törədən 2 qardaşın CİNAYƏT İŞİ

"Ölkə.Az" xəbər verir ki, hadisə rayonun Aşağı Atuc kəndində baş verib.

Kafedə mübahisə zəminində kənd sakini Cabir Əhmədxanov Aşağı Xuc kənd sakini Babək Şükürovu üstündə gəzdirdiyi bıçaqla qətlə yetirib.

Quba rayon prokurorluğunda CM-nin 120.1-ci (qəsdən adam öldürmə) maddəsi ilə cinayət işi başlanılıb.

Təyin olunan məhkəmə-tibbi ekspertizanın rəyinə görə Babək Şükürovun ölümünə ürəyin və qarnın zədələnməsindən törənən kəskin qan itirmə səbəb olub.

Təqsirləndirilən şəxs qismində dindirilən Cabir Əhmədxanov bildirib ki, mərhum Babək Şükürovu əvvəl tanımayıb. Valideyinləri və qardaşı ilə Atuc kəndində yaşayıb. Onlar Bakı-Quba yolunda yerləşən kafeyə mütəmadi gedərək dostları ilə yeyib-içiblər.

İyulun 22-si saat 20:00 radələrində evdən çıxaraq kafeyə gedib və orda tək oturaraq pivə içib. Birazdan kafeyə xalası oğlu və dayısı oğlu gəlib. Onlar ayrı masada oturaraq içki içməyə başlayıblar. Bir saatdan sonra qardaşı Cavid gələrək xalasıoğlu gillə əyləşib. Bir müddət sonra içki qurtardığı üçün qardaşı yaxınlıqdakı mağazadan bir şüşə içki alaraq onların yanına qayıdıb. Həmin axşam hər biri təxminən 1lt-dən artıq spirtli içki qəbul ediblər:" Saat 11-in yarısı idi kafeni işlədən Araz yaxınlaşdı ki, artıq gecdi bağlayıram. Dedim 10-15 dəqiqədə oturaq qalxacıq. Bu vax Arazın həmkəndlisi Babək bizə kobud formada dedi ki, dərhal kafeni tərk edin. Əsəbi halda gəlib mənim köynəyimim yaxasından tutanda qardaşım onun əlindən itələdi. Bu vaxt Babək qardaşımın sinəsindən yumruqla vurdu, oda yerə yıxıldı".

Ordan-burdan

Cabir Əhmədxanov daha sonra bildirib ki, onlar kafedən çıxıb çöldə dalaşmağa başlayıblar. Şükürov güclü olduğundan onunla əlbəyaxa bacarmayacaqlarını düşünüb. Həmişə üzərində gəzdirdiyi bıçağı sağ cibindən çıxararaq oda davaya qoşulub. Əlindəki bıçaqla Babəkin qarnına, ardınca isə ürək nahiyyəsinə zərbələr endirib. Sonra hər ikisi yumruq və təpiklə zərbələr vurmaqda davam ediblər.

Ətrafdakı insanlar onları ayıraraq sakitləşdirməyə çalışıblar. Yaralı Babək Şükürov hadisə şahidlərinin köməkliyi ilə xəstəxanaya aparılarkən yolda dünyasını dəyişib.

Məhkəmə iclasında Cabir Əhmədxanov ittiham üzrə özünü qismən təqsirli bilib və barəsində ədalətli qərar qəbul edilməsini xahiş edib. Cavid Əhmədxanov isə özünü təqsirli bilməyib.

Zərərçəkmiş şəxsin hüquqi varisi təqsirləndirilən şəxslərə ən ağır cəza təyin olunmasını xahiş edib.

Məhkəmə nəticəyə gəlib ki, Cabir Əhmədxanova elan edilmiş ittihamdan CM-nin 120.2.1-ci ( qabaqcadan əlbir olmaqla qəsdən adam öldürmə) maddəsi xaric edilməli, onun əməli 120.2.2-ci (xuliqanlıq niyyəti ilə qəsdən adam öldürmə), 120.2.3-cü(zərərçəkmiş şəxsi ictimai borcunu yerinə yetirməsi ilə əlaqədar qəsdən öldürmə), Cavid Əhmədxanova elan olunmuş ittihamdan 120.2.1-ci, 2.2-ci və 2.3-cü maddələr xaric edilməli, onun əməli 221.3-cü maddəsi ilə tövsif olunmalı və onlar həmin maddələrin sanksiyası çərçivəsində cazalandırılmalıdırlar.

Sonda məhkəmənin hökmü ilə Cabir Əhmədxanov 18, qardaşı Cavid isə 5 il müddətinə azadlıqdan məhrum edilib.

Ölkə.Az