Bakıda ərini yatdığı yerdə qətlə yetirən qadın hakim qarşısında

Bakı Ağır Cinayətlər Məhkəməsində həyat yoldaşını yatdığı yerdə öldürməkdə təqsirli bilinən Günay Şixaliyevanin cinayət işi üzrə məhkəmə hazırlıq iclası keçirilib.

“Ölkə.Az” xəbər verir ki, hakim Eldar Mikayılovun sədrliyi ilə keçirilən prosesdə anket məlumatları toplanılıb.

İş üzrə məhkəmə baxış iclası iyunun 22-nə təyin olunub.

Qeyd edək ki, martın 7-də saat 05 radələrində Suraxanı rayonu, Yeni Suraxanı qəsəbəsi ərazisində 1976-cı il təvəllüdlü Şıxəliyev Mahir Oqtay oğlunun yaşadığı evdə üzərində xəsarət izləri olan meyitinin aşkar edilməsi barədə rayon prokurorluğuna məlumat daxil olub.

Prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib.

Aparılmış ilkin araşdırmalarla zərərçəkmiş şəxsin arvadı 1980-ci il təvəllüdlü Şıxəliyeva Günay Arif qızının ailə-məişət münasibətləri zəminində Mahir Şıxaəliyevin yatmış vəziyyətdə olmasından istifadə edərək dəmir linglə onun baş nahiyəsinə çoxsaylı xəsarətlər yetirərək qəsdən öldürməsinə əsaslı şübhələr müəyyən edilib.

Günay Şıxəliyeva şübhəli şəxs qismində tutularaq istintaqa cəlb edilib.

Ölkə.Az