Yutubdan pul qazanmaq planı quran dostlar necə qatil oldu? - Xurma bağındakı FACİƏ

Tərtərdə dostu ilə birlikdə əmisini tamah məqsədilə öldürməkdə təqsirləndirilən Cavad Kərimov və onun dostu Zamin Abbaszadənin cinayət işi üzrə təfərrüatlar məlum olub. Qətl hadisəsindən əvvəl şeir yazmaq, rep oxumaq planları quran və bununla da "Yutub" kanalından pul qazanmağı düşünən dostlar sonradan qatil olublar. Məhkəmədə isə onlar bir-birini ittiham ediblər.

Ölkə.az musavat.com-a istinadən xəbər verir ki, hadisə Tərtər rayonunun Sarov kəndində baş verib.

Kənddə "Matı" ləqəbi ilə tanınan Niyaməddin Kərimov tamah məqsədi ilə öldürülüb. Qətli 20 yaşlı Cavad Kərimov və dostu 19 yaşlı Zamin Abbaszadənin törətdiyi müəyyən edilib.

İstintaq belə qənaətə gəlib ki, Cavad uşaq vaxtı əmisinin onu döyməsini bəhanə gətirərək qisas almaq istəyib. Bunun üçün onu öldürməyi planlaşdırıb və dostu Zamindən kömək istəyib. Zaminə əmisinin bir neçə inək satdığını, evdə pul da olduğunu deyib və bununla da onu şirnikləndirib.

Cinayət işi materiallarında göstərilir ki, hər iki şəxsin planı Niyaməddin Kərimovun digər ailə üzvlərini də öldürmək, sonra evi yandıraraq izi itirmək olub.

Onlar Niyaməddin Kərimovun yanına gələrək onu yüngül həyat tərzi sürən qadın yanına getməyi təklif ediblər. Niyaməddin Kərimov da bununla razılaşıb. Onlar bir müddət Niyaməddin Kərimovun həyətində oturublar. Çay içib, domino oynadıqdan sonra bağ sahəsinə gediblər. Orada Niyaməddin Kərimova qəfil hücum edərək çoxsaylı bıçaq zərbələri endiriblər.

Niyaməddin Kərimovun öldüyünü düşündükdən sonra onun evinə qayıdıblar. Bu zaman mərhumun arvadı onları görüb. Cavad və Zamindən Niyaməddin Kərimovun harada olduğunu soruşub. Cavad və Zamin isə yüngül həyat tərzi sürən qadının yanına getdiklərini, qadının qardaşı gəldiyi üçün oradan qaçdıqlarını, amma Niyaməddin Kərimovun orada qaldığını deyiblər.

Niyaməddin Kərimovun ailə üzvlərini öldürmək qərarından daşınan Cavad və Zamin yenidən bağa qayıdıblar. Bu zaman Niyaməddin Kərimovun ölmədiyini görüb ona növbəti dəfə çoxsaylı zərbələr endirib, sonda isə boğazını kəsiblər.

Cavadın anası məhkəmədə deyib ki, mərhum onun oğlunu uşaq vaxtı çox döyüb. Cavad da tez-tez bunun qisasını əmisindən alacağını deyirmiş. Onun ifadəsindən məlum olub ki, o, ərindən boşandıqdan sonra Cavadla birlikdə yaşayıb. Amma Cavad əmisigilə tez-tez gedib, onun bağında işləyirmiş.

Məhkəmədə dindirilən Cavad və Zamin Niyaməddin Kərimovun öldürülməsində bir-birini ittiham ediblər.

Zamin deyib ki, Cavadı bağda xurma yığarkən tanıyıb və münasibətləri yaranıb. Zamin Cavada məktəb illərində şeir yazdığını, hazırda da meyxana dediyini bildirib. Cavad da şeir, rep yazdığını, mahnı oxuduğunu söyləyib: “Cavad Mingəçevirdə səsyazma studiyasının olduğunu dedi. Manhı və meyxanalar yaza biləcəyini söylədi. Mahnıları Yutuba yükləyib pul qazanmağı planlaşdırdıq”.

Hadisə günü Niyaməddin Kərimovun evinə getdiklərini deyən Zamin bildirib ki, qətl törətməklə bağlı planları olmayıb və Cavadın belə bir iş törədəcəyini düşünməyib:

“Bağda olanda Niyaməddinlə söhbət edirdik. Birdən Cavad arxadan gəldi. Niyaməddin ona nəsə edəcəyimizi düşünüb məni şillə ilə vurdu. Cavad qaçaraq ona yaxınlaşdı və boğazından bıçaqla vurdu. Mən də dizimdən xəsarət aldım. Sonra bıçağı mənə verdi ki, cibimə qoyum”.

Zamin onu da deyib ki, Cavadın Niyaməddinin arvad-uşağını öldürmək niyyəti olsa da, ona imkan verməyib.

İsintaqda qətl törətməsini etiraf edən Zamin məhkəmədə fərqli ifadə verməsini belə izah edib: “Cavad dedi ki, bıçaqda sənin əl izin var. Mən qətli tək boynuma alsaydım, mənə kömək edəcəkdi. Mən də ona görə bu cür ifadə verdim. İndi isə çox peşmanam”.

Cavad isə ifadəsində əmisini öldürmək planının olduğunu deyib. Amma hadisə günü qətli Zaminin törətdiyi söyləyib. Cavad deyib ki, dostu Zaminin atası və yaxınları ondan qətli boynuna götürməsini istəyiblər. Buna görə də ona 3 min manat da pul təklif ediblər.

Məhkəmə tərəfləri dinlədikdən sonra belə qənatə gəlib ki, Zamin və Cavadın məsuliyyətdən yayınmaq məqsədi ilə bir-birini ittiham edən ifadələr verirlər.

Cavad və Zaminin qətli planlı şəkildə törtədiyi məhkəmə istintaqı zamanı da sübuta yetirilib.

Beləliklə, Gəncə Ağır Cinayətlər Məhkəməsində hakim Faiq Mahmudovun sədrliyi ilə çıxarılan hökmə əsasən hər iki şəxs Cinayət Məcəlləsinin 120.2.1-ci (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürmə), 120.2.4. xüsusi amansızlıqla və ya ümumi təhlükəli üsulla adam öldürmə) və 120.2.5-ci (tamah məqsədi ilə və ya sifarişlə, habelə zərərçəkmiş şəxsin orqanlarından və ya toxumalarından istifadə etmək məqsədi ilə adam öldürmə) maddələri ilə təqsirli bilinərək 17 il müddətinə azadlıqdan məhrum ediliblər.