Tərtərdə 20 yaşlı arvadını öldürməkdə təqsirləndirilən ər hakim qarşısında
Tərtər rayonunda həyat yoldaşını qətlə yetirməkdə ittiham olunan 2000-ci il təvəllüdlü Sahib Əlizadənin cinayət işi üzrə məhkəmə istintaqı başlayıb.
"Ölkə.Az" xəbər verir ki, cinayət işi Gəncə Ağır Cinayətlər Məhkəməsində hakim Roman Ələkbərlinin sədrliyi ilə araşdırılır.
İş üzrə növbəti məhkəmə baxış iclası noyabrın 16-na təyin olunub.
İttihama görə, bu ilin mayın 4-də, saat 12 radələrində Tərtər rayon sakini 2003-cü il təvəllüdlü Leyla Məhərrəmovanın ölməsinə dair rayon prokurorluğuna məlumat daxil olub.
Aparılmış araşdırmalarla 2000-ci il təvəllüdlü Sahib Əlizadənin aralarında yaranmış mübahisə zamanı arvadı Leyla Məhərrəmovanı kəsici-deşici alətlə xəsarət yetirərək qəsdən öldürməsinə əsaslı şübhələr müəyyən edilib.
Müəyyən edilib ki, Sahib Əlizadə həyat yoldaşının atasının evinə gedərək onu həyətyanı sahəyə çağırıb. Aralarında düşən mübahisədən sonra onu qətlə yetirib.
Cütlük boşanma ərəfəsində olub. Sahib Əlizadə həmçinin qayınanasına da bıçaq xəsarətləri yetirib.
Hadisəni törədən Sahib Əlizadənin barəsində Cinayət Məcəlləsinin 120.1-ci (qəsdən adam öldürmə) maddəsi ilə ittiham elan edilib.