Hədəfi bir olan xalqın Vətəni gül qoxar - Döyüş silahlarını dəyişirik
“Sülh üçün savaşmalıyıq”, “Millilik yönündə addımlar atmalıyıq”, “Dözümlü olmalı, amma unutmamalıyıq” və s. buna oxşar fikirlər.
"Azərbaycanlılara qarşı nifrət cinayətləri və nifrət nitqi" hesabatının təqdimatı ilə bağlı Sosial Tədqiqatlar Mərkəzidə keçirilən tədbirdə belə çıxışlar səsləndirildi.
Qarabağın azadlığından, suverenliyimizin tam bərpasından sonra yenidən inşa edilən Azərbaycanımız üçün olduqca əhəmiyyətli, taleyüklü nüanslardır.
Nə qədər qəribə səslənsə də, sülh üçün həqiqətən savaşmalıyıq, lakin bu dəfə taktiki döyüşü seçməliyik: sözlü, yəni diplomatik – fiziki təzyiq olmadan, nifrət nitqi ilə mübahisə etmədən, faktlara, dəlillərə söykənərək. Həm paradoksal, həm də olduqca incəlik və məsuliyyət tələb edən strategiyadır. Emosional varlıq olan insanın yalnız rasional yöndə fəaliyyət göstərməsi asan iş deyil, amma bu, artıq tələbdir. Üstəlik, yorulmadan, çünki yorğunluq planları alt-üst edə bilər. Düz hədəfə vurmaq üçün ehtiyac duyulan parametlərlərdən biri hisslərin cilovlanmasıdır. Necə deyərlər, "soyuq başla" düşünməliyik.
Əslində, döyüş davam edir, amma bu dəfə hərbi texnikanı ağıl, məntiq, diplomatiya və bu kimi “silahlar” əvəz edir. İndi əlimizdə tutduğumuz “silah” hərb sənayesinin ən müasir texnikasından da olduqca güclü olmalıdır. Hazırkı məqamda açılan atəş geniş ərazini əhatə etməlidir, qarşımızdakı təkcə Ermənistan deyil, həm də onun havadarı olan dünya gücləridir.
Millilik – Azərbaycan üçün yuxarıda göstərilənlərə əməl etməyi diktə edən əsas elementlərdən biri. Dövlətimizin bütün məsul vəzifələrindən tutmuş sıravi vətəndaşınadək ölkəmizi əvvəlkindən də çox sevməli, ona əsgər olmalıyıq. Ölkəmizi müqəddəs görməyi aşılayan "Millilik" anlayışıdır ki, bu ruhiyyədə olmayan hər bir fərd zəif bəndə çevriləcək. Bilərəkdən, bilməyərəkdən, istəmədən hətta düşmənə xidmət edəcək. Millilik isə bir sədd kimi mənfiliklərin qarşısında dayanacaq, qaranlıq yola işıq salacaq.
Vətənini sevən, milli hisslərlə alışıb-yanan bir vəzifəli şəxs həm ölkəsinin vətəndaşına, yəni Azərbaycanın həm daxilinə, həm də xarici məsələrinə lazım olan münasibəti göstərəcək.
Dözümlü olmalıyıq. Bəli, çətin işlər dözümlülük, səbir, təmkin, böyük zəhmət və əziyyət tələb edir. Həm də unutmamalıyıq... Nə qədər dözümlü davranıb nifrət nitqindən istifadəyə yol verməmək zəruridirsə, unutmamaq, təhsil sahəmizdə, dəlilli, sübutlu yazdığımız tarixi, yaşadıqlarımızı, çıxardığımız nəticələri də sənədləşdirmək mühümdür. Gələcək nəsillər eyni səhvləri buraxmamaqla yanaşı, həm də olduqca tədbirli olmalıdırlar. Dözümlü olmasaq, açdığımız atəş hədəfə yox, özümüzə dəymiş olar. Bizi çətin və çıxılmaz vəziyyətə salar.
Tədbirdə müzakirə üçün vaxt azlığı olsa da, reqlamentə uyğun olaraq çıxışlar zamanı belə məqamlara toxunuldu və müsbət haldır ki, hesabat yola verilirmiş kimi təqdim olunmadı. İştirakçı kimi məndə xoş ovqat yaratdı. Əvvəllər xalq olaraq bir deyimimiz vardı: Qarabağdan sonra hər şey düzələcək. Əgər tədbirlər, fəaliyyətlər bu yöndə, bundan da artıq şəkildə təşkil olunacaqsa, əlbəttə, deyim praktikada özünü göstərəcək. Vətəndaş olaraq belimizi dövlətimizə söykəyib Azərbaycanımız naminə böyük işlər uğrunda çalışacağıq.
Fərqli qoxu, zövqlü ətir gəlir. Axı Vətən bağı al-əlvandır, ətrin gəlir Xarıbülbül.
Bəlkə tədbirdən təsirlənmişəm, amma ölkəmizin sözü keçən mütəxəssisləri ilə birgə dövlət yetkililərinin çıxışı məndə bu ovqatı yaratdı. Hamıya söz haqqı verildi, təkliflər dəyərləndirildi, müsbət ab-hava və s., əsl qalib ölkənin qalib ortamı kimi... Bəlkə də tədbirdə hamının hədəfi bir idi – Vətən idi ona görə...
Samir Mirzə Miri
Ölkə.Az
