Rusiyanın isterik davranışları: öyrənəcəklər, öyrədəcəyik! - Replika
Ümumiyyətlə, bu hal böyüklərin, adlı-sanlı insanların özünü rəzil duruma salmasına bənzəyir: hörmətin, izzətin, qüdrətin ola, amma adam ola bilməyəsən. Bax, bu cür cılız davranışlardır Rusiya siyasətinin simvoluna çevrilən.
O boyda coğrafiyanı əhatə edən dövlət guya TASS-da “Stepanakert” yazdırtmaqla nəyəsə nail olacağını düşünür. O boyda Kremldə oturan “bazburudlu strateq”lərin gördüyü işə baxın: “Gör indi qaqan nağaracağ” səviyyəsində! Bikar olanda “kimə sataşaq?”, “kimə ataq, qabağa düşək?” tipli səviyyəsiz, daha doğrusu, çox səviyyəsiz davranış sərgiləyirlər. Yeri gəlmişkən, səhvlərini sonradan düzəltdilər. Bu, postsovet məkanında itirilmiş hegemonluğun psixoloji əks-sədasıdır.
Guya beynəlxalq hüquqa meydan oxumaq istəyirlər, Xankəndinin adını bilərəkdən səhv yazırlar. Amma elə özləri Qarabağın mərkəzindən reportaj hazırlayıb "Rossiya 1" kanallarında təqdim etmişdilər. Həmin süjetlərdə “Xankəndi” adını dəfələrlə işlətmişdilər. Nə oldu, indi nə dəyişdi? Özlərini inkar etmək siyasətə çevrilib sanki. Nə qədər özlərinə hörmət qoymayacaqlar bu cür addımlarla? “Velikiy Rasiyyaaa” deyib öyünmək asandır, amma vallah, belə böyüklük olmur. Bu, cırtqozluqdur!
Əlindən heç nə gəlməyib “Narahat olma, bussaat həll eliyəjəm” obrazında hoppanıb-düşən avantürist “ideoloqlar”la nəyə nail olmaq olar ki? Bir ölkənin öz nüfuzunu qoruma tərzi onun siyasi mədəniyyətinin və diplomatik etikasının göstəricisidir.
Qarabağda özbaşına heykəl quraşdıranda, bunun söküləcəyini də gözə almalıydılar. Sülhməramlı adını daşıyan qüvvə sülhə zərbə vuran addım atmaz. Sənin işin münasibətləri gərginləşdirmək deyil, əksinə, sabitliyə xidmət etməkdir.
Deyirdilər, “Ayağımız hara dəyirsə, ora Rusiyadır”… Bəli, getdiniz işinizin arxasınca! Rusiya cılız hərəkət etdiyini anlaması üçün qanunsuz abidənin haqlı olaraq söküldüyünü görməliydi. Daha çox qıvrılacaq, daha çox əlini masaya, divara vurub bağıracaq Kremlin isterik “başbilənləri”. Amma Azərbaycan dövləti artıq sübut edib ki, xarici təzyiqlər və manipulyasiyalar qarşısında geri çəkilməyəcək qədər müstəqil və siyasi iradəyə malikdir.
Barmaq silkələməyi xoşlayırlar, amma biz də o barmağı qatlayıb ciblərinə qoydurmağı bacarmışıq, çox şükür! Tarixin arxivlərinə qarışan hegemonluq illəri ilə yaşamaq sindromundan qurtulacaqlar. Və öyrənəcəklər! Öyrədəcəyik! Azərbaycanla hansı dildə, hansı tonda danışmaq lazım olduğunu!
Getsinlər, bir az su içsinlər, əsəb dərmanı atsınlar, sakitləşdirici otlarla, yoqa kursları ilə özlərinə məlhəm olsunlar. Sonra ayıq başla baxsınlar: əgər Rusiya doğrudan da qarşılıqlı hörmətə əsaslanan bərabər tərəfdaşlıq istəyirsə, bu, ultimatumlarla yox, hüquqla və ədalətlə mümkündür.
Siyasi cümlələrlə yox, sadə dildə desək: Cənubi Qafqaz ölkələrinin Rusiyaya münasibəti Kremlin normal və sağlam əlaqələr qura bilməməsinin sübutudur. “Qolu zorlu, başı boş” obrazlı insanlara xas davranışla siyasət yürütmək olmaz.
İsterik reaksiyalar pozulmuş balansın, itirilmiş üstünlüyün etirafıdır. Bu reallığı nə qədər gizlətməyə çalışsalar da, faktlar danışır.
