Natavan-Tolik qarşıdurması: "Tolik üzr istəməlidir"
"Tolikin yazdıqları məğlub şəxsin psixoloji portretidir"
Ölkə.Az xəbər verir ki, yanvarın 22-i tanınmış müğənni Natavan Həbibinin prodüser Əliyev Tarixə ( Tolik) qarşı "Şərəf və ləyaqətin, işgüzar nüfuzun müdafiəsinə dair" iddia tələbi üzrə Bakı Apelyasiya Məhkəməsində mülki işə baxılmışdı.
Məhkəmə kollegiyasının yekun qərarı ilə Xətayi Rayon Məhkəməsinin Natavan Həbibinin xeyrinə çıxardığı qətnamə dəyişdirilmədən qüvvədə saxlanılmış, prodüserin iddiası qəbul edilməmişdi.
Qərardan sonra Tarix Əliyev Instagram hesabında qəzəbini gizlətməyib:
Natavan Həbibi də Tolikin yazdıqlarına biganə qalmayıb.
Ölkə.Az-a məlumat verən müğənni bildirib ki, prodüser üzr istəməlidir. Onun fikrincə, apelyasiya məhkəməsində prodüser Tolikin məğlubiyyəti ona pis təsir edib:
"Mən demək istəyirəm ki, bu ölkədə qanunlar var və bu qanunlar məhkəmələrdə düzgün tətbiq olunur. Kimliyindən asılı olmayaraq, heş kəs qanunları və məhkəmə qərarlarını şübhə altına ala bilməz. Məhkəmədən sonra Tolikin Instagramında yazdıqları isə sadəcə məğlub şəxsin psixoloji portretidir. Tolik yazdığı yalanlara və təhqirlərə görə üzr istəməlidir", - deyə Natavan Həbibi bildirib.
Müğənni Tolikə məhkəmədə qalib gəlmək üçün yaxından köməklik göstərməyə cəhd edən "vəzifəliləri" də düzgün mövqe tutmağa, qanunlara hörmət etməyə cağırıb.
Xatırladaq ki, Xətayi Rayon Məhkəməsinin qətnaməsinə əsasən, Əliyev Tarix Natavan Həbibinin ünvanına işlətdiyi yalan məlumata görə, təkzib verməli və təhqiramiz ifadələrə görə üzr istəməlidir. Qətnamədən narazı qalan prodüser apelyasiyaya şikayət vermişdi.
Ölkə.Az
