Həbsi istənilən Röyanın prodüseri danışdı

Vəkil Adəm Məmmədovun "Röya Ayxan tutularaq Daxili İşlər Nazirliyinin müvafiq şöbəsinə aparılmalı və əməlinə görə cavab verməlidir” fikrinə qarşı tərəfdən cavab gəlib.

Müğənninin prodüseri Kənan Bayramov Ölkə.Az-a açıqlamasında bildirib ki, sözügedən məsələylə bağlı yaxın günlərdə geniş açıqlama veriləcək. Hazırda özünün və Röyanın xaricdə olduğunu deyən Bayramov məsələnin araşdırılmalı olduğunu diqqətə çatdırıb:

"Həmin açıqlamadan xəbərimiz var. Hazırda hər ikimiz xaricdəyik. Amma Bakıya qayıdıb ətrafli açıqlama verəcəyik. Qoy məsələ araşdırılsın, kimin haqlı, kimin haqsız olduğu üzə çıxsın".

"Əməkdaşımızın Röyanın görüşdüyü şəxs ora polisin əliylə gətirilmişdi" sualına da cavab vermək istəməyib: "Araşdıranda görəcəklər, heç narahat olmayın".

Qeyd edək ki, vəkil Adəm Məmmədov azvision.az-a müğənninin sosial şəbəkələrdə yayılan videosunun qanunvericiliyi pozduğunu söyləyib, Röya Ayxanın cəzalandırılması üçün daxili işlər naziri Ramil Usubov və baş prokuror Zakir Qaralova müraciət edib.

“Vətəndaşı söyüşləri özünə qaytarması üçün məcbur etmək və gizli video çəkmək Azərbaycan Respublikasının Konstitusiyasına böyük bir hörmətsizlikdir. Mən bu hərəkətlə bağlı daxili işlər naziri cənab Ramil Usubov və baş prokuror Zakir Qaralova müraciət edirəm. Bu, elə-belə çəkiliş deyil. Həmin şəxs tanınmış adamdır. Onun belə bir hərəkətə yol verməsi Konstitusiyamıza xələl gətirir.

Xahişim ondan ibarətdir ki, Röya Ayxan və çəkilişdə iştirak edən digər şəxslər tutularaq DİN-nin müvafiq orqanlarına gətirilsinlər. Və onların bu gəlişləri kütləvi informasiya vasitələrində işıqlandırılsın.

İstintaq Röya xanımın əməlində hansı cinayət əməlinin olduğunu müəyyən etməlidir. Onun bu əməli cinayət məsuliyyəti yarada bilər”.

Xatırladaq ki, sənətçinin "Instagram"da onu təhqir etmiş şəxsə qarşı gördüyü tədbirin sosial şəbəkələrdə videosu yayılıb. Röya özü isə sözgedən videonu belə şərh edib: “Mənim əzizlərim, "Instagram"da şəxsiyyətimi təhqir edənlər, elə bilirsiniz dərəbəylikdi? Kim hansı qiyməti istəyir, onu da qoyur mənə, sonra da bax belə tapıb gətirirsən özü də polis əliylə. Deyir ki, dediyim sözlər anama, bacıma aiddi. Vay-vay bu dırnaqarası bəzi kişiciklərin axırı hara gedir görəsən? Elnur Orucov axı sənə lazım idi, niyə axı o sözləri ananıza deyirsiniz? Axı səni zülmlə böyüdür ki, sizin kimi “......”. Bu ölkədə heç kəs cinayətdən yayına bilməz. Hamı cavabını verəcək mütləq!”.

İntiqam VALEHOĞLU
Ölkə.az