Dünyaca məşhur rejissorun Ölkə.Az-a eksklüziv

Rejissor Priyadarşan Bollivud tarixinin ən məhsuldar ikinci rejissorudur.

89 ekran işində imzası var. Dünyanın bir çox yerlərində əfsanə olaraq qəbul edilən məşhur hind aktyorları da məhz onun filmlərinin "məhsuludur". Bu günlərdə çəkilişlərinə başlayacağı "Yekun qətnamə" filmində xalq artistləri Rasim Balayev, Həmidə Ömərova, Amaliya Pənahova və əməkdar artist Fizuli Hüseynov da rol alıblar. Dünya kinosunun məşhur rejissoruyla həm film barədə, həm də Bakıyla bağlı təəssüratlarını soruşmuşuq. Beləliklə, Ölkə.Az dünyaca məşhur rejissor Priyadarşanın müsahibəsini təqdim edir.

- Cənab Priyadarşan, əvvəlcə bilmək istərdik ki, "Yekun qətnamə" filminin çəkilişləri təkcə Bakıda olacaqmı, yoxsa bölgələrdə də nəzərdə tutulur?

- Filmin bir hissəsi Azərbaycanın əyalətlərində çəkiləcək. İlk hissə Bakıda lentə alınacaq.

- Konkret hansı bölgələrdə?

- Biz sözsüz ki, çəkiliş aparacağımız bütün yerlərə səfər etmişik. Azərbaycandan olan tərəfdaşlarımız komandamızı çəkiliş məkanlarıyla tanış ediblər. Artıq Gəncədə çəkiliş məkanlarımız bəllidir. - Bildiyimə görə filmdə ana obrazı var. Aktrisalarımızdan hansı bu obrazı canlandıracaq?

- Hələlik bu obraza kimin çəkiləcəyi tam dəqiqləşməyib.

- Bu sizin azərbaycanlı aktyorlarla ilk iş birliyinizdir. Azərbaycanlı aktyorlarla işləmək çətin olmayacaq ki?

- İnanıram ki, çətin olmayacaq. Hər iki dili bilən köməkçilərim var. Hətta azərbaycanlı var ki hind dilini başa düşür. Eyni zamanda bu filmdə çəkiləcək azərbaycanlı aktyor və aktrisalar təcrübəli insanlardı. Mən Vyetnam kimi bir ölkədə çəkilişlər etmişəm. Vyetnam mənim üçün anlaşılmaz dili olan bir yerdir. Amma orada da insanlarla ortaq dil tapa bildik.

- Bakıda diqqətinizi ən çox çəkən nə oldu?

- Bakıya ilk gəlişimdə bu şəhər çox xoşuma gəldi. Avropanın bir sıra ölkələrində, o cümlədən İspaniya, Polşa və Rumıniyada reklam çarxları çəkmişəm. Amma Bakıda diqqətimi ən çox cəlb edən gecə saatlarında şəhərin işıqlandırılmasıdır. Bakı gecələri çox möhtəşəm olur.

- Filmdə çəkiləcək azərbaycanlı aktyor və aktrisaların hamısı şübhəsiz ki, peşəkardır. Amma Azərbaycanda belə peşəkarlar yetərincədir. Bəs niyə məhz bu dörd nəfər?

- Əsas məsələ onların təcrübəli və peşəkar aktyor olmalarıdır. Bu, bir rejissor kimi mənim işimi asanlaşdırır.

- Azərbaycanda hind rəqsləriylə peşəkar formada məşğul olan rəqqasə var-Oksana Rəsulova. Bu xanım hətta Hindistanda keçirilən nüfuzlu rəqs müsabiqəsinin qalibi oldu. Onu da bu filmdə görmək sizinçün maraqlı olardımı?

- Bildiyiniz kimi bu emosional bir trillerdir. İstəyirəm ki, daha çox hissiyyatlara toxunan bir film ərsəyə gətirim, nəinki müzikl.

- Doxsana yaxın film çəkmisiniz. Bu isə o deməkdir ki, yüzlərlə aktyorla işləmisiniz. Sizinçün ən arzuolunan aktyor, aktrisa kimdir?

- Amidap Baçanı xüsusi qeyd etmək istəyirəm. O, çox tanınmış və peşəkar aktyordur. Digər bəyəndiyim isə Mohanlal Vişvanatan Nairdi. O, hazırda Hindistanda çox məşhurdu.

- Adını çəkdiyiniz bu iki aktyorun digərləriylə müqayisədə hansı özəllikləri var?

- Çox təbii oynayırlar. O qədər təbii oynayırlar ki, onların aktyor olduğunu düşünə bilmirsiniz.

- Azərbaycandan seçdiyiniz dörd nəfərdən birinin - aktyor Fizuli Hüseynovun cizgiləri, xüsusən də gözləri hindistanlıları xatırladır. Bu amil seçimdə rol oynadımı?

- Xeyr, onun zahiri görkəminin seçimimdə heç bir rolu yoxdur. Azərbaycanda insanlara diqqətlə fikir vermişəm. Azərbaycanlıların əksəriyyəti Hindistanın şimalında yaşayan insanlara bənzəyirlər.

- Sadəcə, biz nisbətən ağbənizik...

- Kəşmirdən olan hindistanlılarla bənzərliyiniz çoxdur.

- Gələcəkdə Azərbaycan aktyorlarını çəkdiyiniz digər filmlərə dəvət etməyiniz mümkündürmü?

- Əgər ssenariyə uyğun gəlsələr, məmnuniyyətlə dəvət edəcəyəm.

- İndidən gözaltı etdiyiniz kimlərsə var?

- Hələ ki elə biri yoxdur.