Nurlan Əzizbəyli: "Qadın dedi ki, əlli yaşın da olsa, arvadını boşayıb məni alacaqsan"

Bir zamanların tanınmış müğənnisi, hazırda isə o qədər də gündəmdə olmayan Nurlan Əzizbəyli Ölkə.az-ın suallarını cavablandırıb.

- Nurlan bəy, xeyli vaxtdır efirlərdə görünmürsünüz. Yaradıcılığınızda hansı yeniliklər var?

- Yaradıcılığımla bağlı yeniliklərim çoxdur. Bu il sənət fəaliyyətimin 30 ili tamam olur. İnşallah, oktyabr-noyabr aylarında mərkəzi konsert salonlarının birində yaradıcılıq gecəm keçiriləcək. Hələlik, məkan dəqiqləşməyib. Orada mənim barəmdə qısametrajlı sənədli film təqdim olunacaq, sənətkarlar çıxış edəcəklər. Amma ona qədər yay məkanlarının birində solo konsertim planlaşdırılır.

- Xeyli vaxtdır yoxsunuz. Narahat deyilsiniz ki, konsertə gələn olmaz?

- Mən bu barədə heç vaxt narahat olmamışam. Nə vaxt konsert vermişəmsə, məni sevən insanlar gəliblər. Çünki sənətimə həmişə ehtiyac duyulub. Özümü tərifləmirəm, bunu bilən bilir. Qarşıda bir neçə mahnıya klip çəkdirmək planım var.

- Klipləri kim çəkəcək, mahnılar kimindir?

- Öz mahnılarım da var, türk mahnıları da. Rejissor Nail Naiboğlu və bir-iki gənc rejissorla işləyəcəyik. Gənc rejissorların öz istəkləri oldu, mən də etiraz etmədim. Gürcüstana və Ukraynaya qastrol səfərlərim də nəzərdə tutulur. Bu konsertlər diaspora xətti ilə baş tutacaq.

- Səhnəyə gəlişiniz çox möhtəşəm oldu, hətta 1991-ci ildə çəkilmiş "Təhminə" filmində gənc istedad kimi adınız çəkilir. Amma sanki gəldiyiniz kimi də bir kənara çəkildiniz...

- Bu gün əsl sənəti olanlar bir az arxa plandadır. Efirlərdə üzdəniraqlar baş alıb gedir. Hansı kanalı açırsan, eyni simalar, eyni üzlər. Sənətindən, peşəndən asılı olmayaraq, onun əsl bilicisi olmalısan, məktəb keçməlisən. 1985-ci ildən, səkkiz yaşımdan böyük səhnədəyəm. Biz korifeylərdən bəhrələnmişik, dərs keçmişik, məhz onların razılığı il böyük səhnələrə çıxmışıq. İndi hər şeyi ucuzlaşdırıblar. Kimsə nəyinsə hesabına efirə çıxır...

- Efirə çıxmaq üçün nə vaxtsa pul vermisiniz?

- Heç vaxt. Özləri bilirlər ki, mən efirə pul ödəyən deyiləm. Hər gün efirdə olmasam da, hər zaman təmənnasız olmuşam.

- Belə deyirlər ki, qadın müğənnisi gündəmdə olmaq üçün soyunmalıdır. Bəs sizcə, bir kişi müğənnisi Azərbaycan şou biznesində gündəmdə olmaq üçün nə etməlidir?

- (düşünür) Heç o barədə düşünməmişəm.

- Sənətlə, bəlkə kiməsə söz atmalıdı, yaxud şəxsi həyatını gündəmə gətirməlidir?

- Bu gün gündəmdə qalmaq üçün hamı qalmaqal axtarır. O şeylər də mənə yaddır. Heç vaxt qalmaqala qaçan olmamışam. Əgər sənətimlə sözümü deyirəmsə, bayağı şeylər nəyimə lazımdır?

- Əminizin, xalq artisti Ramiz Əzizbəylinin sizin sənət taleyinizdəki rolu bəzən həddən artıq qabardılır, bəzənsə tam əksinə. Əslində necə olub?

- Əmimin özü də bu barədə dəfələrlə müsahibə verib. Əmimin sənət aləmində mənə heç bir köməkliyi dəyməyib. Əmi kimi başımızın tacıdır, əzizimizdir. Amma özü də deyib ki, Nurlan indiyə kimi nail olduğu bütün uğurları özü qazanıb.

- Əminizə son dəfə nə vaxt baş çəkmisiniz?

- Hər həftə biz onlardayıq. Tanıdığın adamın o vəziyyətə düşməsi çox ağırdı, o ki qaldı öz əmin ola.

- Yanına kimlər gəlib gedir?

- Flora Kərimova, Azər Zeynalov, Brilliant Dadaşovanı görmüşəm. Tələbələri , müəllim yoldaşları da gəlirlər.

- Fərdi qaydada pedaqoji fəaliyyətiniz var idi. İndi də varmı?

- İndi də var. Amma yay olduğuna görə uşaqları istirahətə buraxmışam.

- Bir ara sosial şəbəkələrlə bağlı problem yaşadınız, ailənizdə söz-söhbət oldu. Yenə də sosial şəbəkələrdən istifadə edirsiniz?

- Təbii ki, indi də istifadə edirəm, amma qədərində. Çaşanları vaxtında yerində oturtmaq lazımdır.

- Nə yazırlar sizə?

-Bir qadın mənə sevgi etirafı etmişdi. Ona başqa cür cavab verməsəm də, bu yoldaşımda qıcıq oyatmışdı. Sonradan da aydın oldu ki, sən demə biz bu xanımla bir məktəbdə oxumuşuq.

- Nə yazmışdı?

- Watsap-da yazmışdı ki, sənin hətta əlli yaşın da olsa, yoldaşını boşayıb, məni alacaqsan. Mən də ona yazdım ki, sən əlli yaşında hansı vəziyyətdə olacaqsan, ondan xəbərin var? Yoldaşım dedi ki, gərək ona cavab verməzdin.

- Mehran adlı bir oğlunuz var...

- Mehranın on yaşı var. Ona mənim yox, əmimin genləri keçib. Aktyorluğa istəyi daha çoxdur. Amma mən istəməzdim. İstəməsəm də, onun seçiminə qarışmaq fikrim yoxdur. Məsələn, 38 yaşımdayam və başqa sənətimin olmamasına görə səhv etdiyimi düşünürəm..

- Dolanışıq baxımından?

- Bəli.

- Fəxri adınız da yoxdur...

- Yoxdur.

- Adətən səntçilər bununla bağlı müraciət edirlər. Siz harasa müraciət etmisiniz?

- Mədəniyyət və turizm naziri Əbülfəs Qarayevin qəbulunda olmuşam. Dedi ki, sən bizim gözümüzün qarşısında böyümüsən, uşaqlıqdan dövlət konsertlərində olanda bunların çoxu yox idi. Sonra da bildirdi ki, ölçü götürəcəyik, mən də gözləyirəm. Xarici dövlətlərdə dövlətimin bayrağını qaldıranda, indikilər nəinki səhnədə deyildilər, heç bünövrələri yox idi.

İntiqam VALEHOĞLU
Ölkə.az