Məşhur müğənni fırıldaqçıların qurbanı oldu: Görün onun adından necə istifadə ediblər

Rusiyalı məşhur müğənni Larisa Dolina fırıldaqçıların qurbanı olub. Fırıldaqçılar kredit götürmək üçün müğənninin Moskva vilayətindəki bağını girov qoymağa cəhd ediblər.

Publika.az xəbər verir ki, bunu müğənninin yaradcılıq işləri üzrə direktoru Sergey Pudovkin “Komsomolskaya Pravda” ya bildirib.

Son vaxtlar mediada Dolinanın Protasovkadakı evini girov qoyaraq illik 30 faizlə 50 milyon rubl borc almağa çalışdığı barədə məlumatlar yayılıb. Bildirilib ki, müğənninin yubiley turunu təşkil etmək üçün vəsait lazım olub. Sergey Pudovkinin sözlərinə görə, bu, fırıldaqçılar tərəfindən hazırlanan saxta məlumatdır.

“Son bir neçə gün ərzində Larisa Aleksandrovna mikromaliyyə təşkilatlarından kreditlərin verilməsi üçün müraciətlər alır. Təbii ki, rəsmi olaraq belə müraciətlər olmayıb: belə müraciətlər üçün heç bir əsas yoxdur. Bunlar maliyyə resurslarına çıxış əldə etmək üçün məşhur addan istifadə edən fırıldaqçılardır”, Pudovkin bildirib.

O əlavə edib ki, vəkili müğənnini bu barədə artıq məlumatlandırıb. Larisa Dolina polisə müraciət etməyi planlaşdırır.