"Bunu həyat yoldaşıma hiss etdirmək istəmədim"

"Kaş həm səhnədə, həm də ailəmlə, övladlarımla birlikdə ola biləcəyim bir məqam olardı. Bu şəraiti yarada bilərdim, amma məsafə buna imkan vermədi. Əgər burada ailə qursaydım, yenə də səhnədən uzaqlaşacaqdım. Ailə mənim üçün hər şeydən önəmlidir".

"Ölkə.az" xəbər verir ki, bu sözləri müğənni İradə İbrahimova rejissor Nail Naiboğlunun yutub layihəsində deyib. Sənətçi ailə qurduqdan sonra həyatında baş verən dəyişikliklərdən danışıb:

"Səhnə üçün darıxırdım. Dəfələrlə özümə etiraf etmişəm ki, səhnə üçün çox darıxmışam. Mən səhnədə olmalı olan bir insanam. Ora Allahın verdiyi bir işıqla çıxıram, səhnəyə yaraşıram. O zaman bunu dilə gətirsəydim, həyat yoldaşım başqa cür başa düşərdi. Ona hər zaman burada xoşbəxt olduğumu, həyatımdan razı qaldığımı hiss etdirirdim. Çünki o da məni səhnədən uzaqlaşdırıb aparanda özünü pis hiss edirdi. Həyat yoldaşım mənə heç vaxt səhnə qadağası qoymayıb. Kənara çəkilmək mənim öz seçimim idi".

Övladlarından söz açan İradə onların rəfiqəsi olmağa çalışmadığını bildirib:

"İradə anadır, rəfiqə ola bilməz. Onların çox rəfiqəsi olacaq, amma ana bir dənədir. Biri var dülgər olasan, biri də var bağban. Mən bağban olmaq istəyirəm. Hər şeyi mənimlə bölüşmələrini istəmirəm. Bölüşəcək və bölüşülməyəcək nələrsə var. İndi də həsrət yaşayıram. Doğmalarımla birlikdə olmaq arzusu var. Özümə təsginlik verirəm, sakitləşdirirəm. Səbəblərim var. Ailə quranda uşaq deyildim".