Roza Zərgərlidən təqdirəlayiq STATUS: \"Həmkarlarım, bəsdir xalqın nifrətini qazandıq\"

Müğənni Roza Zərgərli sosial şəbəkədə yemək fotosu paylaşan həmkarlarına müraciət ünvanlayıb.

Ölkə.az xəbər verir ki, sənətçi sosial şəbəkədə belə fotoların insanları qıcıqlandırdığını qeyd edib:

"Həmkarlarıma və dostlarıma müraciət edirəm. Dünən yeməklə bağlı status yazdım və başa düşdüm ki, insanlar sənətçilərin sosial şəbəkədə yerləşdirdiyi yemək şəkillərindən, dəbdəbəli həyat tərzindən, bahalı avtomobillərdən, villalardan həqiqətən qıcıqlanır. Biz sənətçilərə dəyər verən elə bu xalqdır. Az-çox nəyə nail olmuşuqsa, məhz bizi hansısa hərəkətimizə görə qınayan, tənqid edən insanların sayəsindədir. Əgər bizi bu xalq yüksəldibsə, deməli, yeri gələndə qınamağa da haqqı var. Bizim də borcumuz onların tutduğu iradları nəzərə almaqdır. Belə bir deyim var-ruzini verən Allahdır. Amma gəlin bəndələri də unutmayaq. "Səndən hərəkət, məndən bərəkət" deyə bir misal da var. Öz hərəkətlərimizi kənardan görüb tənqidi yanaşa bilmiriksə, o zaman həmin çörəyi mütləq itirəcəyik. Ona görə deyirəm ki, insanları qıcıqlandıran fotolar paylaşmamalıyıq. Çünki bizi izləyənlər arasında hamilə qadınlar, imkansız insanlar da az deyil. Şəxsən mən özümə kənardan baxmağa çalışdım və səhvlərimi gördüm. Çox istərdim ki, sənət yoldaşlarım bir daha bu haqda düşünsünlər".

Qeyd edək ki, sənətçinin bu barədə yazdığı dünənki status böyük ajiotaja səbəb olmuşdu.

İntiqam VALEHOĞLU
Ölkə.Az