Həftənin icmalı

İqtidar-müxalifət görüşündə nələr baş verdi?

"Əsas odur ki, görüş baş tutdu"

Xəbər verdiyimiz kimi? bu gün Beynəlxal Mətbuat Mərkəzində iqtidar və müxalifət partiyaları arasında dialoq baş tutub. İqtidar-müxalifət görüşünün 8 partiya arasında keçirilməsi nəzərdə tutulsa da, tədbirə nəzərdə tutulduğundan daha çox siyasi partiya təmsilçiləri gəlib.

Azərbaycan Respublikası Prezidentinin Administrasiyasının İctimai-siyasi məsələlər şöbəsinin müdiri görüş zamanı müzakirə olunan əsas məsələlərdən danışıb.

Görüşdən sonra Əli Həsənov mətbuata açıqlama verərək bildirib ki, bu dialoqda müzakirə olunan əsas məsələlər son dövrdə baş verən həbslər, media azadlığı, ümumiyyətlə müxalif partiyaların fəaliyyəti, hökumətin gördüyü işlər, partiyaların maliyyələşdirilməsi, qərargahla təmin olunması müzakirə olunub və yekun qərar kimi bu görüşlərin davam etdirilməsi qərara alınıb.

Əli Həsənov qeyd edib ki, bütün bu məsələlərin müzakirəsi yekunlaşdırılıb və hamısı birlikdə prezident və xüsusi orqanlara təqdim olunacaq. Bununla bağlı tədbirlər görüləcək.

Əməkdaşımız görüşdən sonra bir sıra partiyaların liderlərinin keçirilmiş dialoq barədə fikirlərini öyrənib.

Klassik Xalq Cəbhəsi Partiyasının lideri Mirmahmud Mirəlioğlu:

"Əsas odur ki, görüş baş tutdu. Görüşün təşəbbüskarı olan 11 partiyadan 8-i burada iştirak edib. Bizim təklif etdiyimiz bəzi məsələlər həllini tapandan sonra görüşün növbəti vaxtı dəqiqləşəcək", - deyə partiya sədri qeyd edib.

Ümid Partiyasının sədri İqbal Ağazadə:

"Görüşün nəticələri barədə danışmaq hələ tezdir. Əsas odur ki, bizim təklif etdiyimiz bəzi məsələlər öz həllini tapsın. Ölkədə siyasi məhbusların sayı günü-gündən artır. İstərdik ki, bu problem də öz həllini tapsın və bundan sonra Prezident Administrasiyası bütün partiyaları, "Müsavat", "Xalq Cəbhəsi" daxil olmaqla, hamısını birlikdə dəvət etsin", - deyə İqbal Ağazadə deyib.

****

Ulu öndər Heydər Əliyevin vəfatından 11 il ötür

Azərbaycan ictimaiyyəti dekabrın 12-də ümummilli lider Heydər Əliyevin vəfatının on birinci ildönümündə Fəxri xiyabanı ziyarət edir.

Gün ərzində ulu öndərin məzarını ictimai xadimlər, ziyalılar, hökumət rəsmiləri və parlament nümayəndələri də ziyarət edəcəklər.

Azərbaycanın tarixi və taleyi Heydər Əliyevin adı ilə qırılmaz tellərlə bağlıdır. Bu illər ərzində xalqın ictimai-siyasi, iqtisadi və mədəni həyatının bütün sahələrində dirçəliş məhz onun adı ilə bağlıdır.

Heydər Əliyev rəhbərlik etdiyi bu dövr ərzində daim tərəqqisi üçün çalışdığı, zəngin mədəniyyəti, böyük tarixi keçmişi ilə həmişə qürur duyduğu və gələcək nəsillərin taleyi üçün düşündüyü doğma yurdu Azərbaycanı bir dövlət kimi zamanın ağır və sərt sınaqlarından çıxarıb.

O, böyük siyasi və dövlət xadimi, xalqın şəriksiz lideri olaraq hələ sağlığında canlı əfsanəyə çevrilib, buna görə də Heydər Əliyev fenomeni həmişə diqqətləri cəlb edib, dünya azərbaycanlılarının ümummilli liderinin heyranlıq doğuracaq dərəcədə coşğun siyasi fəaliyyəti istər ölkə, istərsə də dünya mətbuatında geniş işıqlandırılıb.

Azərbaycan xalqı öz milli dövlətçiliyinin dağılmaq təhlükəsi qarşısında qaldığını gördüyü və artıq ən ağır günlərini yaşadığı bir zamanda - 1993-cü ilin iyununda mövcud hakimiyyətin dəyişilməsini təkidlə tələb edib və həmin vaxtdan taleyini yenə Heydər Əliyevə etibar edib. Xalqının dar gündə qaldığını görüb onun təkidli dəvətini qəbul edən Heydər Əliyev Azərbaycanda yenidən böyük siyasətə qayıdıb. Xalq Heydər Əliyevin bu qayıdışını ümid və sevinclə qarşılayaraq, həmin günü Milli Qurtuluş Günü kimi müstəqil Azərbaycanın tarixinə yazıb.

Heydər Əlirza oğlu Əliyev 1923-cü il mayın 10-da Azərbaycanın Naxçıvan şəhərində anadan olub. O, 1939-cu ildə Naxçıvan Pedaqoji Texnikumunu bitirdikdən sonra Azərbaycan Sənaye İnstitutunun (indiki Azərbaycan Dövlət Neft Akademiyası) Memarlıq fakültəsində təhsil alıb. Başlanan müharibə ona təhsilini başa çatdırmağa imkan verməyib.

1941-ci ildən Heydər Əliyev Naxçıvan MSSR Xalq Daxili İşlər Komissarlığında və Naxçıvan MSSR Xalq Komissarları Sovetində şöbə müdiri vəzifəsində işləyib və 1944-cü ildə dövlət təhlükəsizliyi orqanlarında işə göndərilib. Bu dövrdən təhlükəsizlik orqanları sistemində çalışan Heydər Əliyev 1964-cü ildən Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildən isə sədri vəzifəsində işləyib, general-mayor rütbəsinə qədər yüksəlib. Həmin illərdə o, Leninqradda (indiki Sankt-Peterburq) xüsusi ali təhsil alıb, 1957-ci ildə isə Azərbaycan Dövlət Universitetinin Tarix fakültəsini bitirib.

Azərbaycan Kommunist Partiyası Mərkəzi Komitəsinin 1969-cu il iyul plenumunda Heydər Əliyev Azərbaycan Kommunist Partiyası Mərkəzi Komitəsinin birinci katibi seçilərək respublikanın rəhbəri olub. 1982-ci ilin dekabrında Sovet İttifaqı Kommunist Partiyası Mərkəzi Komitəsi Siyasi Bürosunun üzvü seçilən Heydər Əliyev SSRİ Nazirlər Soveti sədrinin birinci müavini vəzifəsinə təyin edilib və SSRİ-nin rəhbərlərindən biri olub. Heydər Əliyev 20 il ərzində SSRİ Ali Sovetinin deputatı, beş il isə SSRİ Ali Soveti sədrinin müavini olub.(Trend)

****

“Cənub axını” rəsmi şəkildə ləğv edildi

Avropa Komissiyasının sədr müavini Maroş Şevçoviç Rusiyanın energetika naziri Aleksandr Novakla telefon söhbətində “Cənub axını”nın ləğvi barədə məsələ təsdiqlənib.

Ölkə.Az-ın apa-ya istinadən məlumatına görə, Avropa Komissiyasının yaydığı açıqlamada “Cənub axını” layihəsinin rəsmi şəkildə ləğv olunduğu bildirilib.

Bundan əvvəl Rusiya rəsmiləri layihədən vaz keçdiklərini desələr də, Brüssel bunun rəsmi surətdə təsdiq olunmasını tələb etmişdi. Bundan əvvəl isə M. Şevçoviç bildirmişdi ki, “Cənub axını” layihəsi ilə alınması düşünülən qaz həcmini əvəzləmək üçün Avropa Komissiyasının üç mümkün variantı var.

****

Qorbaçov: " "Soyuq" müharibə artıq başlayıb"

Qorbaçov Rusiya və Qərb arasında münasibətlərdən narahatdır.

Ölkə.Az-ın verdiyi xəbərə görə SSRİ-nin ilk prezidenti Mixail Qorbaçov "Time" jurnalına müsahibəsində bildirib ki, ABŞ şəxsi məqsədlərinə nail olmaq üçün dünyanı çevirməyə hazırdır, lakin indi Rusiya buna qarşı çıxmağa qadirdir.

"Rusiyalıları alçaltmaq çətindir. Biz öz vacibliyimizi dərk edirik. Mən anladım ki, amerikalıları dinləmək olar, lakin güvənmək olmaz. Onların başına bir ideya gələrsə, onlar bunu reallaşdırmaqdan ötrü dünyanı çevirəcəklər", - deyə Qorbaçov bildirib.

Qorbaçov qeyd edib ki, Ukraynda hadisələrinin fonunda Rusiya və Qərb arasında yeni soyuq müharibə artıq başlayıb.

"Biz artıq "soyuq" müharibəni müşahidə edirik? Sözsüz ki, bəli. İnsanlar təkcə yeni "soyuq" yox, həm də "qaynar" müharibədən danışırlar. Görünür ki, ciddi həyəcan siqnallarının vaxtı çatıb. Dünya qaynayır", - deyə Qorbaçov əlavə edib.

Keçmiş prezident bəyan edib ki, amerikalılar təvazökarlıq nümayiş etdirməli və qanunla Rusiyaya məxsus olan dünyada güc rolunu oynamağa mane olmamalıdır

Xatırladaq ki, noyabrın 8-i Qorbaçov bildirmişdi ki, dünya "soyuq" müharibənin astanasındadır.

****

Neft böhranı: BP ixtisarlara başladı

Gələn il şirkət məcburi ixtisarlara 1 mlrd. dollar sərf edəcək

Böyük Britaniyanın “British Pertoleum” (BP) neft-qaz şirkəti dünya bazarında neftin qiymətinin kəskin ucuzlaşması səbəbindən gələn il yüzlərlə iş yerinin məcburi ixtisarına 1 mlrd. dollar sərf edəcək.

Bunu BP-nin prezidenti, baş icraçı direktoru Robert Dadli bildirib.

Onun sözlərinə görə, bu ixtisarlar şirkətin ABŞ, Böyük Britaniya, Almaniya və Azərbaycan nümayəndəliklərinə də təsir edəcək.

Bununla belə, BP-nin rəhbəri bildirib ki, böyük ehtimalla ixtisarlar platformada işləyən işçilərə aid olmayacaq.

“BP-Azerbaijan” şirkətinin mətbuat xidmətinin rəhbəri Tamam Bayatlı bildirib ki, bu məsələyə qısa zamanda münasibət bildiriləcək: “Hazırda iclasdayam. Çıxan kimi, sizinlə əlaqə saxlayacam”.(APA)

****

İlham Əliyevin sözçüsü ABŞ-ın ittihamlarına cavab verdi

“ABŞ Dövlət Departamentini diqqəti öz ölkəsində insan haqlarının kobud şəkildə pozulması hallarına yönəltməyə çağırıram”.

Ölkə.Az Azərbaycan Respublikası Prezidentinin mətbuat katibi Azər Qasımovun apa-ya verdiyi müsahibəsini təqdim edir.

- ABŞ Dövlət Departamentinin və Avropa İttifaqının sözçüləri, Avropa Şurası və AŞPA rəhbərləri Xədicə İsmayılova ilə bağlı bəyanatla çıxış ediblər. Yenidən məsələyə münasibətinizi bilmək istərdik.

- Mən bir daha bəzi beynəlxalq təşkilatların nümayəndələrinin və ABŞ Dövlət Departamentinin bu bəyanat və çıxışlarını Azərbaycana qarşı aparılan qərəzli, heç bir fakta və reallığa əsaslanmayan, açıq-aydın ikili standartlara söykənən bir kampaniyanın davamı kimi qiymətləndirirəm.

İqtisadi böhran yaşayan Avropada insan haqlarının tapdalanması, irqi ayrı-seçkilik, faşizm meyllərinin artması, multikulturalizmə qarşı hücumların gücləndiyi bir dövrdə Avropa strukturlarının nümayəndələri beynəlxalq ictimaiyyətin əsas diqqətini öz problemlərindən yayındırmağa çalışırlar.

ABŞ Dövlət Departamenti nümayəndəsi Cen Psakinin çıxışına gəldikdə isə, onun Xədicə İsmayılova ilə bağlı verilən suallara cavablarına diqqəti yönəltmək istəyirəm. O, on gün ərzində verdiyi iki bəyanatda demək olar ki, bir söz belə dəyişilmədən, yenə də heç bir reallığa əsaslanmayan şablon ifadələr işlətməklə, bir daha öz qeyri-peşəkarlığını nümayiş etdirib. Mən bir daha ABŞ Dövlət Departamentini diqqəti öz ölkəsində insan haqları və azadlıqları, ümumiyyətlə demokratik prinsiplərin açıq-aydın və kobud şəkildə pozulması hallarına yönəltməyə çağırıram. İrqi zəmində qarşıdurma, Ferqyuson hadisələri ilə bağlı öz haqlarını müdafiə etmək üçün etiraz aksiyasına çıxmış dinc nümayişçilərə qarşı sanki hərbi əməliyyatlar keçirilməsinin, günün günorta çağı heç bir müqavimət göstərməyən insanın polislər tərəfindən boğulub öldürülməsi, hətta uşaq və yeniyetmələrin polislər tərəfindən qətlə yetirilməsi kimi dəhşətli halların biz bu yaxınlarda şahidi olduq.

Ötən dəfə bu məsələlərlə bağlı sualınıza cavab verərkən Amerika Birləşmiş Ştatlarında söz və fikir azadlığı sahəsində vəziyyətin də acınacaqlı olduğunu bildirmişdim. Bu ölkədə kütləvi informasiya vasitələri nümayəndələrinə qarşı təqiblər geniş vüsət alır, jurnalistlər peşə fəaliyyəti ilə məşğul olduqları zaman həbs olunur, hüquq-mühafizə orqanları tərəfindən kütləvi informasiya vasitələri əməkdaşlarının telefon danışıqları və internet yazışmaları tam nəzarət altında saxlanılır.

Bütün bunların fonunda beynəlxalq ictimaiyyət Amerika Birləşmiş Ştatları Senatında təqdim olunmuş sənəddə dünyanı şoka salan dəhşətli faktlardan xəbərdar oldu. Məruzədən göründüyü kimi, ABŞ Xüsusi xidmət orqanları tərəfindən işgəncələrin tətbiq olunması uzun illər adi hala çevrilibmiş. ABŞ Dövlət Departamenti öz ölkəsində demokratiyanın və insan haqlarının tapdalanması faktlarını görməməzliyə vuraraq mütəmadi olaraq bir sıra ölkələrdə, o cümlədən, Azərbaycanda baş verən hər hansı kiçik bir hadisəni süni şəkildə qabardaraq beynəlxalq ictimaiyyətə qərəzli, yalan informasiyalar təqdim etməklə məşğuldur.

Bir daha qeyd etmək istəyirəm ki, Azərbaycan müstəqillik əldə etməsindən keçən qısa bir dövrdə demokratiyanın və fundamental insan haqlarının təmin edilməsi sahəsində böyük nailiyyətlər əldə edib və Azərbaycan hökuməti bu istiqamətində fəaliyyətini bundan sonra da uğurla davam etdirəcəkdir.

****

Qarsda Azərbaycan və Türkiyə XİN rəhbərlərinin görüşü olub

Azərbaycan, Gürcüstan və Türkiyə xarici işlər nazirlərinin bu gün Qars şəhərində keçirilən üçtərəfli iclasında iştirakı çərçivəsində xarici işlər naziri Elmar Məmmədyarov türkiyəli həmkarı Mövlud Çavuşoğlu ilə görüşüb.

Azərbaycan Xarici İşlər Nazirliyinin mətbuat xidmətindən verilən məlumata görə, görüş zamanı Azərbaycan və Türkiyə arasında qardaşlığa və dostluğa əsaslanan strateji münasibətlərin inkişaf səviyyəsindən məmnunluq ifadə olunub.

Görüşdə üçtərəfli formatda Azərbaycan, Gürcüstan və Türkiyə arasında keçirilən görüşün regional əməkdaşlığa, sabitliyə və çiçəklənməyə töhfə verdiyi xüsusilə vurğulanıb.

Tərəflər Transanadolu qaz boru kəmərinin və Bakı-Tbilisi-Qars dəmiryolu xəttinin əhəmiyyətini də qeyd ediblər.

Görüşdə, həmçinin regionda və dünyada cərəyan edən hadisələr ətrafında fikir mübadiləsi aparılıb.(Trend)

****

Xədicə İsmayılovanın apellyasiya şikayəti təmin edilməyib

Hakim Abid Abdinbəyovun sədrliyi ilə keçirilən prosesdə qərar elan edilib. Qərara görə, şikayət təmin edilməyib.

Baş Prokurorluğun mətbuat xidmətinin X. İsmayılovanın həbsi ilə bağlı yaydığı məlumatda bildirilir ki, “Azadlıq Radiosu” və “Meydan TV” teleradio şirkətində müxbir vəzifəsində işləmiş Tural Mustafayevin oktyabrın 20-də Dənizkənarı Milli Parkda “Sink oksid” dərmanı qəbul edərək özünü öldürməyə cəhd etməsi faktına görə Səbail Rayon Prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb.

T. Mustafayev Baş Prokurorluğuna müraciət edərək həmin KİV-də işlədiyi müddətdə “Azadlıq Radiosu”nun Bakı ofisində jurnalist işləyən və onunla uzun müddət yaxın münasibətlərdə olmuş İsmayılova Xədicə Rövşən qızı tərəfindən ona qarşı təzyiq və təqiblər edilməsi, mütəmadi olaraq şərəf və ləyaqətinin alçaldıldığına görə özünü öldürmə həddinə çatdırılması ilə əlaqədar barəsində müvafiq tədbirlərin görülməsini xahiş edib.

İstintaqla həmçinin müəyyən edilib ki, T. Mustafayev X. İsmayılova tərəfindən təhdid və təzyiqlərə məruz qaldığından vəziyyətdən çıxış yolu kimi 2014-cü il 1 may tarixdə Bakı şəhərində kirayədə yaşadığı mənzildə mələfədən düzəltdiyi ilgəklə özünü asma yolu ilə öldürməyə cəhd edib, lakin özündən asılı olmayan səbəbə görə niyyəti baş tutmayıb.

Səbail Rayon Məhkəməsinin qərarı ilə X. İsmayılova barəsində 2 ay müddətinə həbs qətimkan tədbiri seçilib. Apellyasiya şikayəti həmin qərardan verilib./Apa/

****

Tanınmış vəkilin fəaliyyətinə xitam verildi

Xalid Bağırovun vəkil kimi fəaliyyətinə xitam verilib.

Ölkə.Az-ın qafqazinfo-ya istinadən verdiyi xəbərə görə, bu barədə Akif Qurbanov məlumat verib.

Səbəb isə “İsmayıllı işi”ndə Xalid Bağırovun məhkəmə çıxışında dövlətçiliyə hörmətsizlik etməsi göstərilib.

****

Yerli icra hakimiyyəti orqanlarının səlahiyyətləri artırılıdı

Cənubi Qafqaz Boru Kəmərinin genişləndirilməsi layihəsi ilə əlaqədar bələdiyyə mülkiyyətində olan torpaqların dövlətin mülkiyyətinə və ya icarəsinə verilməsi ilə bağlı alqı-satqı və ya icarə müqavilələrinin bağlanmasını həyata keçirən orqanın müəyyən edilməsi barədə qərar verib.

Bu barədə Nazirlər Kabinetindən bildiriblər.

Məlumata görə, Cənubi Qafqaz Boru Kəmərinin genişləndirilməsi layihəsi ilə əlaqədar bələdiyyə mülkiyyətində olan torpaqların dövlətin mülkiyyətinə və ya icarəsinə verilməsi ilə bağlı alqı-satqı və ya icarə müqavilələrinin bağlanmasını həyata keçirən orqan qismində yerli icra hakimiyyəti orqanları müəyyən edilib./Oxu.az/

****

Müdafiə Nazirliyi: Erməni kəşfiyyat-təxribat qrupları məhv edildi

Erməni kəşfiyyat-təxribat qrupları Azərbaycan Ordusu tərəfindən məhv edilib.

Müdafiə Nazirliyinin mətbuat xidmətindən Ölkə.az-a bildiriblər ki, dekabrın 8-də axşam saatlarında cəbhənin cənub istiqamətində erməni kəşfiyyat-təxribat qrupları təmas xəttini keçməyə cəhd göstəriblər.

Silahlı Qüvvələrimizin bölmələrinin sayıqlığı, düşmənin yaxınlaşmasının əvvəlcədən aşkar edilməsi və görülən qabaqlayıcı tədbirlər nəticəsində şiddətli atışma zamanı çoxsaylı itki verən ermənilər geri çəkilməyə məcbur edilib.

Azərbaycan Silahlı Qüvvələri tərəfindən heç bir itki yoxdur, cəbhə boyu vəziyyətə tam nəzarət edilir.

****

Xədicə İsmayılın həbsinə hökümətdən — İLK AÇIQLAMA

““Azadlıq” radiosunun əməkdaşı Xədicə İsmayılova konkret cinayət əməlində şübhəli bilinib və məhkəmənin qərarı ilə həbs olunub”.

Ölkə.Az xəbər verir ki, bu sözləri açıqlamasında Azərbaycan Respublikası Prezidenti Administrasiyasının ictimai-siyasi məsələlər şöbəsinin müdiri Əli Həsənov bildirib. Əli Həsənov deyib: “Respublika Baş Prokurorluğunun açıqlaması onun həbsində hər hansı siyasi motivi istisna edir. Buna görə də bəzi yerli və xarici dairələrin, təşkilatların məsələ ilə bağlı səsləndirdikləri bəyanatlar qərəzlidir, əsassızdır və bir mərkəzdən idarə olunan proses təəssüratı bağışlayır. Düşünürük ki, bu siyasiləşmiş bəyanatlar həm də hüquq mühafizə orqanları tərəfindən Azərbaycan qanunvericiliyinə uyğun olaraq bu işlə bağlı obyektiv istintaqın həyata keçirilməsinə təzyiq xarakteri daşıyır.

Hüquqi, demokratik dövlət olan Azərbaycanda bütün azadlıqlar, o cümlədən söz və məlumat azadlığı, hər bir vətəndaşın sərbəst şəkildə öz fikirlərini ifadə etmək hüququ tam təmin edilib. Azərbaycanda mövcud qanunlar çərçivəsində fəaliyyətinə, siyasi baxışlarına, fikirlərinə görə heç bir jurnalist həbs olunmur və bundan sonra da həbs olunmayacaq”./Azərtac/

****

“Yeni ildə əfv olacaq” — ŞAD XƏBƏR

“Yeni ildə əfv fərmanının olması gözləniləndir”.

Bunu jurnalistlərə açıqlamasında Azərbaycanın İnsan Hüquqları üzrə Müvəkkili (Ombudsman) Elmira Süleymanova deyib.

Onun sözlərinə görə bu barədə danışanda qərəz yaranır: “Vaxtilə mən Əfv Komissiyasının üzvü olmuşam, amma əfv fərmanı barədə danışmaq Ombudsman üçün icazəli deyil. Mən çətinlik çəkirəm deyim ki, əfv fərmanı olacaq, ya yox. Amma əfv fərmanın olması gözlənilir"./Apa/

Ölkə.Az