Dünyada ilk Mikroblar zooparkı açıldı

Amsterdamda ilk mikroblar zooparkı açlıb.

Ölkə.Az France Presse agentliyinə istinadən xəbər verir ki, 30 sentyabr tarixində Amsterdam şəhərində dünyada ilk Mikropiya adlanan interaktiv mikroblar zooparkı açılıb.

Bu məkan isə Artis adlanan şəhər zooparkının yaxınlığında yerləşir. Bu zooparkın direktoru uzun illərdir ki, gələnlərə təbiətin təkcə makro yox, həm də mikro səviyyəsini göstərmək arzusu ilə yaşayıb.

Mikroblar zooparkı görünüşünə görə müəyyən dərəcədə laboratoriyanı xatırladır. Mikrocanlıların əksəriyyəti iri ekranlara qoşulmuş mikroskoplar vasitəsilə görünür.

Zooparka gələnlər əməlli-başlı mikrobların həyat və fəaliyyətini izləmək imkanı qazanırlar. Hətta mikrobların çoxalma prosesi də 3 səviyyəli mikroskopların vasitəsilə nümayiş etdirilir.

Son zamanlar adı dillərdən düşməyən Ebola virusunun nəhəng modeli də bu zooparkda təqdim olunub.

Maraqlısı odur ki, Mikropiyada quraşdırılmış xüsusi skaner gələn qonaqların bədənində hal-hazırda olan mikrobların sayını müəyyən edə bilir. Sevgililər isə öpüşərək bir-birinə bu proses zamanı ötürdükləri mikrobların dəqiq sayını öyrənmək imkanı əldə edirlər.

"Mikroblar hər yerdədir. Məhz buna görə mikrobioloqlar bütün sahələrdə olmalıdırlar. Bizim məqsədimiz insanlara mikrobların təbiətdə baş verən qarşılıqlı proseslərin tərkib hisəsi olduğunu sübut etməkdir",- deyə Mikropiyanın direktoru Heyg Balyan bildirib.

Rəşid Mustafazadə

Ölkə.Az