Obama Belçikanın baş nazirinə iki qutu pivə göndərdi

Belçikanın baş naziri Elio Di Rupo ABŞ prezidenti Barak Obamadan iki qutu pivə əldə etdi.

Ölkə.Az İTAR-TASS-a istinadən bildirir ki, baş nazir Braziliyada keçirilən futbol üzrə dünya çempionatında iki ölkə arasında baş tutacaq matç öncəsi Obamaya mərcə girməyi təklif etmişdi.

O, Belçika və ABŞ yığmalarının qarşılaşması ərəfəsində öz şəxsi Twitter hesabında Obamaya mərcə girmək çağırışı etmişdi. Baş nazir uduzan tərəfin sadəcə iki qutu pivəni qalib tərəfə verməsini təklif edib.

27 iyun tarixində "qırmızı şeytanlar" adlandırılan Belçika yığması 2:1 hesabı ilə ABŞ yığmasını məğlub edərək baş nazirin də mərcdə qalib olmasına səbəb olmuşdu. Məğlubiyyətlə barışan ABŞ isə Belçikada yerləşən səfirliyi vasitəsilə Obamanın adından iki qutu "Semuel Adams" pivəsi göndərmişdi.

Rəşid Mustafazadə

Ölkə.Az