Gəncədə həkimlə mübahisə edən şəxs poliklinikanı yandırmağa çalışdı
Gəncədə poliklinikaların birində insident baş verib, vətəndaş tibb müəssisəsini yandırmağa cəhd göstərib.
Ölkə.az "Teleqraf"a istinadən xəbər verir ki, hadisə iyulun 7-də, saat 12 radələrində Akademik Zülfüqar Məmmədov adına Xəstəxananın Poliklinika şöbəsində qeydə alınıb.
İlkin məlumata görə, təyin olunmuş limitdən artıq narkotik tərkibli dərman tələb edən vətəndaş nevroloqla mübahisə edib.
Mübahisədən sonra o, üzərində gətirdiyi tezalışan mayedən istifadə edərək şöbədə yanğın törətməyə cəhd göstərib. Hadisənin qarşısı vaxtında alınıb, xəsarət alan olmayıb.
Əraziyə hüquq-mühafizə orqanlarının əməkdaşları cəlb ediliblər, faktla bağlı araşdırma aparılır.
