Cinsi azlıqlara qarşı törədilən ən səs-küylü

Bir müddət öncə törətdiyi avtomobil qəzası ilə mətbuatın gündəminə "Hətəmpaşa" kimi gələn Dəmirova Ayla Altay qızının (keçmiş adı Dəmirov Hətəmpaşa Altay oğlu) qətli sosial şəbəkələrdə müzakirə mövzusuna çevrilib. Qətli törədən 20 yaşlı şəxsin Aylanın sevgilisi olduğunu deməsi və Dəmirovanı qısqanclıq zəminində qətlə yetirdiyini deməsi isə birmənalı qarşılanmayıb. Bəziləri gənc oğlanın törətdiyi cinayət hadisəsinin yolverilməz olduğunu bildirdikləri halda, bir çoxları "kavaler"i dəstəkləyib. Bu arada qeyd edək ki, qətlə yetirilən şəxs son iki ildə tibbi yolla cinsiyyətini və eyni zamanda rəsmi qaydada adını dəyişdirməyə müvəffəq olmuşdu.

Ölkə.Az məsələnin yetərincə aktual olduğunu nəzərə alıb, son illər cinsi azlıqlara qarşı törədilmiş ən səs-küylü cinayət hadisələrini bir qismini təqdim edir.

Ötən ilin yanvarında Azad LGBT (Lezbiyan, Gey, Biseksual və Transseksual) təşkilatının sədri İsa Şahmarlının özünə qəsd etməsi səs-küylü cinayətlərdən hesab olunur. Hətta onun özünə qəsd etməsi bir neçə gün mətbuatın da əsas mövzusuna çevrilmişdi.

2013-cü ilin sentyabrında isə Biləcəri qəsəbəsində 53 yaşlı Mətləb Nəmiyev bıçaqlanaraq öldürülmüşdü. Sonradan məlum olmuşdu ki, Nəmiyev cinsi azlıqların nümayəndəsidir.

2012-ci ilin aprelində Yasamal rayonu ərazisində də qətl hadisəsində də ölən şəxs cinsi azlıq nümayəndəsi idi. Belə ki, 33 yaşlı İmran Abdullayevin həyatına 16 yaşlı "sevgilisi" qəsd etmişdi.

Bu ilin yanvarında Bakının məşhur barlarından birində 24 yaşlı Ucar sakini Erkin Həsənov (ad şərtidir) əvvəlcə təhqir olunmuş, sonra isə döyülmüşdü.

Daha bir hadisə bu ilin 14 yanvar tarixində Yasamalda baş vermişdi. Belə ki, Gürcüstan vətəndaşı olan Elton Allahverənov (ad şərtidir) rayonun 29-cu polis bölməsinə şikayət ərizəsi ilə müraciət edərək, internetdə tanış olduğu şəxs tərəfindən cinayətə məruz qaldığını bildirmişdi. Allahverənov ərizədə göstərmişdi ki, internetdə tanış olduğu şəxs ona qarşı dələduzluq edib. Belə ki, yanvarın 13-də internetdə Firudin Əbilov adlı şəxslə tanış olaraq görüşmək qərarını gəliblər. Bir qədər sonra Yasamal rayonu M.Həsənov küçəsi 1 ünvanının qarşısında görüşərkən F.Əbilov E.Allahverənovun telefonunu danışmaq üçün alıb. Telefonla danışa-danışa bir qədər irəlilədikdən sonra qaçaraq uzaqlaşıb. Qeyd edək ki, həm polisə şikayət edən, həm də dələduzluq etməkdə şübhəli bilinən şəxs cinsi azlıq nümayəndəsidir.

Xaçmaz rayonunda isə İsmayıl Cəbrayılov cinsi azlıq olan əmisi Eyvaz Cəbrayılovu bıçaqlamış, onun iki tanışından birini isə qətlə yetirmişdi. İsmayıl Cəbrayılovun məhkəmə prosesində dediklərindən:
“Bu barədə hələ 2012-ci ildə onun özünə də dedim, amma boynuna almamışdı. O vaxtdan onunla danışmırdım. Hadisə baş verən gün evdən həyətə çıxanda mərhum əmim Zeydullanın bağında Eyvazın kimlərəsə bərkdən nalayiq sözlər söydüyünü, səs-küy saldığını eşitdim, əsəbiləşdim. Çünki evdə anam, bacılarım, gəlinlərimiz ola-ola əmimin bağda belə hərəkətlər etməsi mənə pis təsir etdi. Əmimin həmin adamlarla əxlaqsızlıqla məşğul olduğunu düşündüm. Əlimdəki alışqanın işığını yandırıb ara yolla bağa gəldim, ondan niyə belə hərəkətlərə yol verdiyini soruşdum və bağdan çıxmasını tələb etdim.
Əmim məni söyməyə başladıqda daha da qəzəbləndim. Bu biabırçılıqdan həm canımızı qurtarmağı, həm də nəslimizin adına vurulan ləkəni təmizləmək üçün bıçaqla əmimin qarnından və sinəsindən zərbələr endirdim. Aşağı əyiləndə belindən də vurdum ki, birdəfəlik ölsün, canımız qurtarsın.
Mən əmimlə mübahisə edən zaman qonşuluqda yaşayan Elşən və Emil də bağdan çıxdılar və məni tutmağa çalışdılar. Bıçaqla onlara zərbə atıb-atmadığım yadımda deyil, baş verənlərdən beynim dumanlanmışdı. Hadisə vaxtı yanımda kimlərin olduğunu xatırlamıram. O yadımadır ki, maşına əyləşib Xaçmaz şəhərinə doğru getdim. Yolda Taleh adlı tanışımı görüb maşını saxladım. Hadisənin təsirindən pis vəziyyətə düşmüşdüm. Ondan sükan arxasına keçməyi xahiş etdim, qəza törədəcəyimdən qorxurdum. Yolda Taleh əlimin yaralandığını görüb nə baş verdiyini soruşanda əmimi bıçaqladığımı, onun ölməli adam olduğunu dedim. Maşınla Biləcəriyə, kirayə qaldığım evə gəldim. Sonradan Elşənin öldüyünü eşitdim. Nə Elşəni, nə də Emili vurmağım yadıma gəlmir. Onları mən vurmamışam. Eyvaz kimi əxlaqsız adamları yalnız öldürməklə onların hərəkətlərinə son qoymaq olar. Belə insanlar cəmiyyət üçün virusdur, mikrobdur. Emilə və Elşənə gəlincə isə bu cür əxlaqsızla oturub-durduqlarına görə başlarına bu cür hadisə gəlməsinin günahı özlərindədir. Məni bu hadisəni törətməyə heç kim vadar etməyib. Əmimi öldürmək istəmişəm. Əməlimdən də peşman deyiləm. Amma Emillə Elşəni kimin vurduğunu bilmirəm”.

Ötən ayın 5-də isə Elvin Ağaverdiyev və Ramin Lətifov cinsi azlıq nümayəndəsi Vüsal Şahbazovu "Xalqlar Dostluğu" metro stansiyasının yaxınlığında maşına oturdaraq ağaclıq sahəyə aparmış, onun 443 manat pulunu, iki ədəd mobil telefonunu əlindən almışdılar. Polisin məlumatında qeyd olunurdu ki, zərərçəkmiş Nizami Rayon Polis İdarəsinə şikayət edib. Keçirilmiş əməliyyat-axtarış tədbirləri nəticəsində Ramin Lətifov isti izlərlə saxlanılıb və məhkəmə qərarı ilə barəsində həbs-qətimkan tədbiri seçilib. Hadisənin digər iştirakçısı Elvin Ağaverdiyev ölkə ərazisini qatarla tərk etməyə çalışarkən polis əməkdaşları tərəfindən Qusar rayonu ərazisində tutulub.

Qeyd edək ki, yazı sözügedən şəxslərə qarşı törədilmiş cinayətlərlə bağlı mətbuatda getmiş yazıların əsasında hazırlanıb.

İntiqam VALEHOĞLU

Ölkə.az