Bakıda hoteldə qəfil ölən Burbulis kim idi? - Onun bilinməyən tərəfləri...

Ölkə.Az xəbər verir ki, bu sözləri siyasi şərhçi Bəybala Mirzəyev deyib.

Qeyd edək ki, keçmiş dövlət katibinin Bakıdakı məşhur hotellərdən birində meytinin tapılması ilə bağlı Azərbaycan Baş Prokurorluğunun İstintaq İdarəsində araşdırmalara başlanılıb.

Hələlik ilkin informasiyalardan məlumdur ki, hadisə Səbail rayonu, Neftçilər prospektində yerləşən “Four Seasons” hotelində baş verib. Belə ki, saat 17:00 radələrində hoteldə qonaq olan G.Burbulisin halı qəfil pisləşib. Dərhal təcili tibbi yardıma müraciət edilsə də, lakin onu xilas etmək mümkün olmayıb.

"Adam dünyada tanınmış analitiklərdən biri idi. Fəlsəfi və politoloji araşdırmaları ilə tanınırdı. Keçmiş SSRİ-nin və Rusiyanın ilk "beyin mərkəzləri"ndən birini qurmuşdu. Belə bir təcrübəli ekspertin Bakıda keçirilən Qlobal Foruma qatılması tamamilə təbiidir. 

Lakin Forumun işində iştirak etmək üçün paytaxtımıza təşrif buyuran Burbulis, deməli, bura həm də əcəlinin dalınca gəlibmiş. Dünyanın nüfuzlu fikir adamlarının, təhlilçilərinin toplaşdığı belə bir forum zamanı həyatla vidalaşmaq da bir analitikin bioqrafiyası üçün olduqca maraqlı sonluqdur", - o bildirib. 

Ekspert qeyd edib ki, bütün hallarda Burbulis öz adını dünya tarixinə yazdırmış bir şəxsdir: "Gennadi Burbulis Sergey Şaxrayla birlikdə 1991-ci il dekabrın 8-də keçmiş SSRİ-nin dağılmasını rəsmiləşdirən "Belovejsk sazişi"nin hazırlanmasında iştirak edən əsas şəxslərdən biri olub. 

Sovetlər  İttifaqı adlı "şər imperiyası"nın dağıdılmasının ideoloqlarından biri olmaq bir siyasətçi üçün ən şərəfli anlardan biri sayıla bilər. 

Burbulis Mixail Qorbaçovun qatı tənqidçilərindən biri kimi tanınırdı. O, həmin vaxt özünü "alovlu demokrat" kimi tanıda bilmiş Boris Yeltsinin hakimiyyətə gətirilməsinə çalışırdı. Yeltsin Rusiyanın prezidenti seçildikdən sonra Burbulis onun ən yaxın adamına, "sağ əl"inə çevrildi. Yeltsinin kabinetinə istənilən anda qapını döymədən girə bilən az sayda şəxslərdən biri olan G.Burbulis həmin vaxt "boz kardinal" adını qazanmışdı. Çünki Yeltsinin bütün işləri məhz onun kurasiyasında idi. 

Lakin sonralar onların münasibətləri birdən-birə kəskin şəkildə pisləşdi. Burbulis Yeltsin üçün "arzuolunmaz şəxs"ə çevrildi. Çünki Burbulis Yeltsini sistemsiz, plansız fəaliyyətinə və "alkaş" həyat tərzinə görə sərt tənqid edirdi". 

B.Mirzəyev qeyd edib ki, Burbulis Putinin də bəzi addımlarını tənqid edib: "Məsələn, 2017-ci ilin sentyabrında Ukrayna televiziyasına müsahibəsində o, Rusiyanın Krımı ilhaq etməsini qətiyyətlə pisləyib.

Bu müdrik analitik ümumiyyətlə, Rusiyanın siyasi elitasının köhnə imperiya təfəkküründən əl çəkməsinin vacibliyini vurğulayır və Rusiyanı davakar, işğalçı dövlət imicindən uzaqlaşdırıb, onu sivil dövlətə çevirməyə çağırırdı. 

Təəssüf ki, hazırkı Rusiyada bu cür işıqlı insanların sayı elə də çox deyil".