Konya ilə Azərbaycanı bağlayan sıx bağlar… - REPORTAJ

Konyanın çoxsaylı gəzməli-görməli yerləri var. Bunların başında Mövlanə Cəlaləddin Rumi məqbərəsi durur. Konyaya səfər edən şəxs ilk növbədə Mövlanə Cəlaləddin Rumi həzrətlərinin  məqbərəsini ziyarət etməyə can atır. Xarici və yerli turistlərin daha çox ziyarət etdiyi bir məkan olduğundan məqbərədə hər zaman izdiham yaşanır. Mövlanə həzrətlərinin doğum günü və vəfat günləri ərəfəsində isə ziyarətçilərin sayı qat-qat çox olur. İl ərzində bir milyondan artıq insan bu məqbərəni ziyarət edir.

Məqbərədə təkcə Mövlanə həzrətlərinin deyil, atası Bəhaəddin Vələdin və digər ailə üzvlərinin, yaxınlarının məzarları yerləşir. Burada Mövlanəyə məxsus geyimlər, yazdığı əsərlərin surəti, əşyaları və digər eksponatlar saxlanılır. 

Konyada Mövlanə həzrətlərinin ustadı Şəms Təbrizinin də məqbərəsi yerləşir. 

Konyanı Azərbaycanla bağlayan sıx bağlar

Konyanı Azərbaycanla bağlayan çox sıx bağlar mövcuddur. Bu bağlar Səlcuklu dönəminə gedir. Ən əsas səbəb Çingiz xanın nəvəsi Hülakünün qərbə hücumlarınadək Azərbaycan ərazisi də Səlcuklunun tərkibində olub.

Digər mühüm cəhət isə Mövlanə Cəlaləddin Rumi ilə bağlıdır. Belə ki, Rumi həzrətlərinin ustadı Şəms Təbrizi, onun davamçısı Çələbi, Mövlanə məqbərəsinin memarı Bürhanəddin Təbrizi  Azərbaycan türküləridir. 

Qarabağlılar Konyada…

Konyada zamanında Azərbaycan ərazisindən, xüsusən də Qarabağdan köçən insanlar yaşayır. 
Səfərimiz çərçivəsində qaldığımız hoteldə gənc Əmirahla tanışlığımız zamanı bəlli oldu ki, Konyada zamanında Qarabağdan köç edən xeyli sayda insan məskunlaşıb. Əmirahın sözlərinə görə, onların ulu babaları Qarabağdan Mərkəzi Anadoluya köç ediblər. Onlar təkcə Konyada deyil, eyni zamanda Afyonkarahisarda məskunlaşıblar. Qarabağlılar əsasən Konyanın Cihanbeyli rayonunda məskunlaşıb və rayonun əsasını onlar təşkil edir. 

Əmirah onu da bildirdi ki, Qarabağdan köç edənlər öz adətlərini unutmamaq məqsədi ilə hər il  festival təşkil edirlər. Festival Afyonkarahisardakı qarabağlı kəndlərində keçirilir. Festival əsasən iyul-avqust aylarında təşkil edilir və orada qədim adət-ənənələri nümayiş etdirilir.  Bu həm də qarabağlıların bir araya gəlməsi üçün bir vəsilə olur. 

Əmirahın dediyinə görə, Afyonkarahisarda  Qarabkökənli bir neçə kənd var və festival məhz ona görə orada təşkil olunur.

Əmirahın arzusu…

Şuşanın - Qarabağın erməni işğalından azad olunduğuna sevindiyini dilə gətirən Əmirah doğma diyarlara ziyarət etməyi arzuladığını bildirdi. “Qarabağ işğaldan azad olanda buradakı qarabağlılar bir araya toplanıb bayram etdilər”, - o bildirib.

Müasir dövrümüzdə isə Səlcuklu Universitetində xeyli sayda azərbaycanlı mütəxəssis və alimlər çalışır. Hətta Səlcuklu Universitetin rəssamlıq, əl işləri fakültəsinin yaradıcıları azərbaycanlılar hesab olunur. Burada dərs deyən İlham, Yaşar və  adları yadımdan çıxan digərləri Konyanın elm və mədəniyyət mühitinə çox böyük töhfələr veriblər. Azərbaycanlı sənətkarlar Konyada təmannasız abidələr ucaldıb.

Azərbaycanlı rəssamların əsərləri Konyanın turistik məkanlarından olan Panorama Muzeyində  sərgilənir.

Panorama Muzeyi

Şəhərin digər görməli yerlərindən biri isə 2017-ci ildə Böyükşəhər Bələdiyyəsi tərəfindən tikilən Mövlanənin həyatını əks etdirən Panorama Muzeyidir. Muzeyin həyətində Türkiyənin və dünyanın müxtəlif şəhərlərində fəaliyyət göstərən Mövləvihanelərin maketləri var.

Muzeyin birinci mərtəbəsində Mövlanənin həyatını əks etdirən əsərlər əks olunub. 

Buranın Azərbaycan üçün mühüm əhəmiyyət kəsb edən cəhəti isə çəkilən rəsm əsərlərinin azərbaycanlı rəssamlar Yaşar Zeynalovla, Teymur Rzayev  tərəfindən çəkilməsidir.

İkinci mərtəbədə isə Anadolu Səlcuqlular dövrünə aid Konya həyatını əks etdirən bölmələrdən barətdir. Bu hissədə Anadoluya sığınan tacirlər, sənətkarlar, alimlər, keşişlər və övliyalar da yer alır və şəhərin həm irqi, həm də dini müxtəlifliyi diqqət çəkir. 

Kelebekler vadisi

Kelebekler vadisi 2015-ci ildən fəaliyyətə başlamasına baxmayaraq artıq Konyanın  simvollarından birinə çevrilib. 

Quru kontinental şəraitdə insanların istirahəti və xoş bir an yaşaması üçün tropik iqlimə malik bir vadi yaradılması möcüzədir.

7600 kvadratmetr ərazini əhatə edən Kəpənəklər vadisində dünyanın ən müxtəlif tropik ölkələrindən gətirilən minlərlə 30-a yaxın kəpənək növü saxlanılır. Vadinin temperaturu 28 dərəcə, rütubətliliyi isə 80 faizdir. Burada eyni zamanda ayrıca böcəklər bölməsi də fəaliyyət göstərir. Burada ziyarətçilərin xoş istirahəti üçün hər cür şərait yaradılıb. 

Konya mətbəxi

Sahəsi baxımından Türkiyənin ən böyük vilayəti olan Konya Anadolu mətbəxinin mərkəzidir. Tarixi irsi olan Konya mətbəxi Səlcuqlu sarayları ilə Mövləvi adətlərinin qarışığından ibarətdir. Osmanlı mətbəxinin də təsiri ilə formalaşan Konya mətbəxində 3 ləzzətli yemək ön plana çıxır: Ət çörəyi, soba kababı və pendirli pide. Konya mətbəxində daha çox quzu və qoyun əti istehlak edilir. Bamya şorbası, tut bəkməzi, cebiç, təndir xəmiri, bıçaq arası pide və sac çörəyi ən məşhur yerli ləzzətlərdəndir.

Şəhərin simvollarından sayılan “Kule siti”nin isə yeri başqa aləmdir. 42 mərtəbəli alış-veriş mərkəzinin sonuncu mərtəbələrində restoranlar yerləşir.  Bura Konyanın ovucunun içindəki kimi seyr etmək imkanı verir. Digər xüsusi məqamı isə restoranın hərəkətli olması, yəni yerində dövrə vurmasıdır. Yemək masası arxasında istirahət edən şəxs bir saat ərzində şəhərin hər tərəfini  seyr edə bilər.

Mürtəza
Ölkə.Az
Bakı-Konya-Bakı