Keşbek nədir və hansı tətbiqlərdən istifadə daha sərfəlidir?

“Keşbek” son illər ən sıx rastlaşdığımız sözlərdəndir. Əksər hallarda endirimlə səhv salınsa da, bunlar tam fərqli anlayışlardır. Endirim hər hansısa bir məhsul və ya xidmət üzrə ödəniş etdiyiniz anda tətbiq olunur və qiyməti dərhal azaldır. Keşbek isə ödəniş edildikdən sonra tətbiq olunur və məbləğin bir hissəsi sizə geri qayıdır.

Ölkəmizdə keşbek qazana biləcəyiniz tətbiqlərin sayı günü-gündən artmaqdadır. Gəlin onlardan bir neçəsini nəzərdən keçirək.

akart (Azercell Kabinetim)

Yalnız Azercell abunəçiləri üçün nəzərdə tutulmuş bu kartı Kabinetim tətbiqində pulsuz əldə etmək mümkündür. Akart yalnız rəqəmsal formatda və 3 il müddətinə təqdim olunur. Onu Apple Pay və Google Pay sistemlərinə də əlavə edərək istifadə edə bilərsiniz. Akart supermarket, aptek, YDM və avtomobil ehtiyat hissələri mağazalarında ödənişlər zamanı 5%, digər kateqoriyalarda isə 1% keşbek qazandırır.

m10

PashaPay şirkətinin təqdim etdiyi m10 tətbiqi bir çox üstünlərə malik elektron pulqabıdır. Tətbiq daxilində istənilən ödənişi etməklə, həmçinin müxtəlif aptek və marketlərdə tətbiqin QR ödəniş funksiyasından yararlanmaqla 2% keşbek əldə edəcəksiniz.

Umico

Bu tətbiqlə kassalarda və tətbiqdəki ödənişlərə, həmçinin aktivliyə görə Umico bonusları qazanırsınız. Bonusları tətbiqdə 1 bonus = 1 AZN, bəzi partnyorlarda isə 1 bonus = 2 AZN məzənnəsi ilə xərcləmək mümkündür. Daha üstün olan Umico Premium abunəliyi isə sizə Umico Marketdə hər ay bir alışa 5%, qalan bütün alışlara 1% keşbek qazandıracaq, çoxsaylı partnyor və brendlərdən artırılmış keşbeklər əldə edəcəksiniz.

Bundan başqa Birbank, UBank, Leobank, Rabita Mobile və digər tətbiqlərin də adını çəkmək olar. Seçim edərkən dövriyyənizi və aylıq hansı kateqoriya üzrə daha çox xərclədiyinizi nəzərə alın. Eyni vaxtda bir neçə tətbiq və servisin təkliflərindən yararlanmaqla müxtəlif kateqoriyalar üzrə maksimal keşbek əldə edə bilərsiniz.