Bir imzaya görə “xain” adlandırıldı, çəkiyə görə karyerasını atdı, “əsl Ronaldo” adlandırıldı - Nazariu kimdir... - VİDEO
18 sentyabr dünya şöhrətli braziliyalı futbolçu Ronaldo Nazariunun doğum günüdür. Bəzi mənbələrdə isə qeyd edilir ki, o, 22 sentyabrda anadan olub.
Ölkə.Az futbolçu haqqında maraqlı faktları bir araya toplayıb.
Tam adı Ronaldo Luis Nazariu de Lima olan futbolçu 1976-cı ildə Braziliyanın Rio-de-Janeyro şəhərində anadan olub.
Ronaldo bir çox futbolçular kimi yoxsulluq içərisində böyüyüb. O, 11 yaşında valideynləri ayrılana qədər dərslərində çox yaxşı idi, lakin ayrılıq onun həyatına təsirsiz ötüşmür və məktəbi ataraq küçələrdə vaxt keçirməyə başlayır.
Məhz bu dövrdə o, futbola olan həvəsini kəşf edir və daha tez-tez oynamağa başlayır. 12 yaşında futzal komandasına qoşulur və burada ilk mövsümündə 166 qolla liqaya rəhbərlik edir.
Ölkəsində 1999-cu ilə qədər Ronaldinyo adı ilə oynayıb. O, Braziliya yığmasına daxil olanda komandasında artıq "Böyük Ronaldo" adlandırılan Ronaldo Rodriqes de Cesus adlı başqa bir oyunçu var idi. Ona görə də 2 futbolçunu fərqləndirmək üçün ona “kiçik Ronaldo” mənasına gələn "Ronaldinyo" ləqəbi verilib. Ronaldo de Assis Moreyranın komandaya qoşulması ilə “Ronaldinyo” ləqəbi sonuncuya verilir və Nazariu öz adı ilə futbola davam edir.
Portuqaliyalı futbolçu Kriştiano Ronaldunun populyarlıq qazanmasından sonra bəzi azarkeşlər onu “futbol dünyasının əsl Ronaldosu” adlandırmağa başlayıb.
Nazariu karyerasına “Kruzeyro” İdman Klubunda başlayıb və 1994-cü ildə PSV-yə keçib. O, 1996-cı ildə o vaxtkı dünya rekordu məbləğində transfer haqqı qarşılığında “Barselona” iləmüqavilə imzalayıb.
20 yaşında 1996-cı ildə FİFA tərəfindən ilin ən yaxşı oyunçusu seçilib, həmçinin 2 il ardıcıl Qızıl top mükafatını qazanıb və bu statusda ən gənc futbolçu olub.
Karyerası boyunca “PSV Eyndhoven”, “İnter Milan”, “Real Madrid”, “Milan”, “Korintians Paulista” klublarında və braziliya millisində oynayıb. Onun ləqəbi "fenomen" olub.
O, 1999-2002-ci illərdə çoxsaylı zədələrinə görə 3 ilə yaxın futboldan uzaq qalıb.
Ronaldo karyerası ərzində dünyanın ən çox satılan idmançılarından biri olub. Adı 2004-cü ildə Pele tərəfindən tərtib edilmiş FIFA 100-ün yaşayan ən yaxşı futbolçular siyahısına və Braziliya, İtaliya, İnter Milan və Real Madridin şərəf siyahısına daxil edilib.
Böyük uğurlarına baxmayaraq, Nazariu heç vaxt UEFA Çempionlar Liqasını qazana bilməyib.
2009-2010-cu illərdə Ronaldo diz əməliyyatından sonra Braziliyanın "Flamenqo" klubunda məşq edib. Özünü bu klubun azarkeşi adlandıran Nazariunun sonradan “Flamenqonun”un rəqibi “Korintians” ilə müqavilə imzalaması qalmaqal yaradıb. Flamenqo azarkeşləri onu "fenomenal xain" adlandıraraq formasını yandırıblar.
Futbolçu isə bildirib ki, “flamenqo”dan ona heç bir təklif gəlməyib.
2007-ci ildə Nazariu “Real Madrid”dən ayrılıb “Milan”a keçən zaman İtaliyanın məşhur məşqçilərindən olan Fabio Kapellodan başqa bütün komamdo yoldaşlarına təşəkkür edib.
Buna səbəb isə Kapellonun Nazariunu çəkisinə görə heyətdən çıxarması idi.
Ronaldo hipotireozdan əziyyət çəkdiyi üçün karyerasının son dönəmində xeyli çəki alıb və buna görə çoxsaylı tənqid və təhqirlərə məruz qalıb.
O, vəziyyəti izah etmək üçün hormon iynələri vurdurduğunu açıqlayıb. Lakin müvafiq qurumların qadağasına görə, 2011-ci ildə peşəkar karyerasını başa vurub.
Ronaldo bütün zamanların ən böyük və ən mükəmməl hücumçularından biri hesab olunur.
Joze Mourinyo Ronaldonu “həyatında gördüyü ən böyük oyunçu” adlandırırdı.
Zlatan İbrahimoviç və Lionel Messi isə onu gördükləri ən yaxşı hücumçu adlandırıblar.
Poqba isə deyirdi ki, Ronaldo Nazariu onun futbola aşiq olmasına səbəb olan şəxsdir.
Peşəkar karyerası başa çatan Nazariu 2018-ci ildə “Real Valyadolid” klubunun səhmlərinin 51%-ni aldıqdan sonra əsas səhmdara çevrilib.
2021-ci ilin dekabrında isə o, 70 milyon dollara uşaqlıqda oynadığı “Kruzeyro” klubunun nəzarət hissəsini alıb.
Karyerası ilə göz önündə olan Nazariu şəxsi həyatı ilə də diqqət çəkib. O, 3 dəfə evlənib və ümumilikdə 4 övladı var.Futbol dünyasının əsl Ronaldosu həm də xeyriyyəçilik fəaliyyətləri ilə tanınır. Onun ümumi sərvətinin 325 milyon dollardan çox olduğu bildirilir.
Billurə Yunus
