Əvvəlcə üz çevirdilər, hamının sevimlisi oldu, Ronaldo ilə bir sıraya qoyuldu - Kante kimdir? - VİDEO
Ölkə.Az haqqında maraqlı faktları təqdim edir:
Kantenin valideynləri ona Bambara imperiyasının böyük Mali imperatoru Nqolo Diarranın adını veriblər. Diarra bir vaxtlar kölə olmuş, daha sonra isə Mali hökmdarına çevrilmiş şəxs idi. Kante Paris küçələrindən çıxaraq böyük oyunçulardan birinə çevrilməklə bu ada layiq olmağı bacarmışdı.
O, futbolçu olmağa ilk dəfə 7 yaşında dünya kubokunu izlədikdən sonra qərar verib. Xüsusilə özü kimi immiqrant kökləri olan Zinəddin Zidan və Tyerri Anri kimi oyunçuların Fransa üçün böyük uğurlar qazandığını görmək onun qərar verməsində rol oynayıb.
Yarımmüdafiəçi 30 il sonra - 2018-ci ildə Fransanın Dünya Kubokunu qazanmasında əsas rol oynayaraq bu arzusunu gerçəkləşdirmişdi.
2012-ci ildə peşəkar debütünü Bulon şəhərinin eyni adlı klubunda edib. Onu komanda yoldaşları “canavar” adlandırırdı.
Kante meydandan kənarda səssiz biri idi, meydanda isə canavara çevrilirdi.Həmin dövrdə Kantenin maşın almağa imkanı yox idi. Buna görə məşqlərə skuterlə gedib-gəlirdi.
“Bulon”dan sonra 2015-ci ildə 5,6 milyon funt sterlinqə “Lester siti”yə 2016-cı ildə 32 milyon funt sterlinqə “Çelsi”yə transfer olub.
Yarımmüdafiəçi kifayət qədər uğurlu olsa da, karyerasının əvvəllərində heç nə yolunda getmirdi.
Boyunun kiçik olması səbəbindən bir çox komanda Kanteni görməzdən gəlib. Hətta “Arsenal”ın əfsanəvi baş məşqçisi Arsen Venqer belə onu transfer etməkdən imtina edib. Fransız məşqçi illər əvvəl verdiyi müsahibədə karyerasınının əvvəlində Kriştiano Ronaldunu, sonunda isə Nqolo Kanteni transfer etmədiyi üçün peşman olduğunu söyləyib.
Nqolo Kante müsahibələrində demişdi ki, futbolda karyera qura biləcəyinə əmin olmadığı üçün kollecdə mühasibat uçotu üzrə təhsil almışdı. Amma sonradan onun istedadı kəşf edilir və Kantenin B planına ehtiyacı qalmır.
Yarımmüdafiəçi oyunçu karyerası boyunca doğru yerdə və doğru zamanda olmağı bacarsa da, əslində o qədər də dəqiq insan deyil. Komanda yoldaşları Kantenin məşqə həmişə gecikdiyini deyirlər.
Keçmiş komanda yoldaşı Ceymi Vardi Kantenin məşqə gecikdiyinə görə cərimələndiyini söyləyib. Lakin Kante cəriməni ödəməkdən imtina edib, bunun əvəzinə isə Afrikadakı insanlara kömək etməyi üstün tutub.
Yarımmüdafiəçi təvazökarlığı, şirin, səmimi və utancaq təbiəti ilə də tanınır. Onu bəzən balaca uşaqlar kimi davrananda, bəzən isə oyundan sonra meydanı yığışdırarkən görmək mümkündür.
Nqolo Kante həmyerliləri Klod Makelele və Lassana Diarradan ilham alıb.
Keçmiş komanda yoldaşı David Luiz deyir ki, Kante müftə yeməyi xoşlayır. Kante onun restoranında yemək yeyərkən həmişə hesabı ödəməməyə çalışır.
1992 və 1993-cü illərdə həmyerlisi və “Mançester Yunayted” əfsanəsi Erik Kantonadan sonra Kante fərqli klublarla ardıcıl iki çempionluq qazanan yeganə oyunçudur.
Komanda yoldaşları məşqə lüks superkarlarla gəlsə də, Kante təvazökar olmağa üstünlük verib. Onun lüks maşın almağa kifayət qədər imkanı olsa da, illərlə ikinci əl mini kuper idarə edib.
Hətta ona 2015-16-cı illərdə “BMW”( i8s) hədiyyə edilsə də, Kante köhnə avtomobilini sürməyə davam edib. Buna səbəb isə İngiltərəyə ilk gəldiyi pulsuz dönəmlərində həmin “mini cooper”in ona hədiyyə edilməsi idi.
“Mən heç vaxt avtomobili sevən biri olmamışam və gənc olanda avtomobil və ya buna bənzər bir şeyə həvəsim olmayıb”, - deyə Kante söyləyir.
O, hazırda Türkiyənin “Fənərbağça” klubunda karyerasını davam etdirir.
Billurə Yunus
